Na dinya de Homayî ra vêşêr çîyêko bîn o bêpeynî çin o. Çi cuye, çi evîn, çi zulm, çi zordarîye, çi serkewtiş, çi vîndîkerdiş, bêguman rocêkê do peynîya her çîyêkî bêro. Senî ke peynîya her çîyê est a, peynîya heme şeranê dinya zî aştî ya, çimkî şer çare nîyo, neçareyî ya. Aştîye kelama Homayî ya û aştîye de kesî vîndî nêkenê.

Kurdistan de nêzdî 45 serran yê mîyanê PKK û Dewleta Tirkîya de şer est o. Nê şerî de wirdî hetan de zî bi hezaran merdiman cuyê xo vîndî kerdê. Nê pirodayîşanê dergûdilan de wirdî (kurd û tirk) hetan zî zaf xusarê pîlî dîyê û zehmetî antê. La peynî de înan zî fam kerd ke bi şerî wirdî hetî zî nêresenê armancê xo, aye semed ra zî înan seba vindertişê şerî û destpêkerdişê aştîye dest bi dîyalogan kerdê. Peynîya ê dîyalogan de zî Serekê PKK’yî Abdullah Ocalanî, hepisxaneyê Îmrali de, veng da PKK’yî ke çekanê xo rono û xo fesix bikero. Badê vengdayîşê Ocalanî PKK’yî zî ca de waştişê ey bi ca ard û vera Tirkîya adirbest îlan kerd. La temsilkarê hetê dewlete îdda kenê û vanê, vengdayîşê Ocalanî YPG’yî zî gêno xo mîyan, aye semed ra tenya çek ronayîşê PKK’yî bes nîyo, coka ganî YPG zî çekanê xo rono. Dima rojeva Tirkîya û Kurdistanî de minaqeşeyî nê dehkerayan ser o vêşî bîyê. Temsilkarê dewlete vatêne YPG zî daxilê vengdayîşê Ocalanî yo, Sirri Sûreya Onderî ra teber temsilkarê DEM Partî zî vatêne YPG daxîlê vengê Ocalanî nîyo, yanê her yewî çîyêk vatêne.

La axarî peynî de Mezlûm Ebdîyî nê îddayê tirkan red kerdî û vat, Ocalanî çîyêko wina (çekronayîş) ma ra nêwaşto.

Raşta ci seba ke ma peyama Ocalanî bi vengê ey nêeşnawite coka ma nêzanê ke Ocalanî çîyêko winayên vat ya nê la ma baş zanenê ke armancê Dewleta Tirkîya astenkerdişê statûyê kurdanê Rojawanê Kurdistanî yo. Tirkîya statûyê kurdanê Rojawanê Kurdistanî ra zaf tersena, coka Tirkîya destpêkê şerê Sûrîye ra heta nika seba ke kurdan bêstatû verado bi heme hêzê xo galeyê kurdan kerd, bi hezaran çeteyî teber ra ardê û weye kerdê û şirawitê kurdan ser o, bi kilmekê çîyê ke nêmendî kerdî û ardî serreyê kurdan. La enê şer û çehdê Tirkîya heme bêhavil mendê, yanê çîyê ke Tirkîya cira tersena do bêrê sereyê ci, çimkî heme rayîrî Sûrîye de statûyê kurdan mojnenê.

Mesela çekronayîş nîya

Semedê çareserkerdişê perseyan dîyalog û muzakere hertim xebitnayîşê çekan rê başêr o, la derdê Dewleta Tirkîya çareserkerdişê persan nîyo, teslîmbîyayîşê kurdan o. Çimkî eke kurdê Rojawanê Kurdistanî çekanê xo ronê do bibê werdê fekê çeteyanê Tirkîya û ê terorîstê DAÎŞ’î do reyna sey Şengal terteleyê neweyî bîyarê sereyê şarê ma. Aye semed ra zî mesala çekronayîş nîya, dişmenîya vera kurdan a. Çikî çi eleqeyê YPG’yê bi Tirkîya çin o, o tenya Rojavawanê Kurdistanî de, hardê xo ser de şarê kurdî galeyanê çeteyan ra paweno. La semedo ke Tirkîya estbîyayîşê xo çinêbîyayîşê kurdan ser o awan kerdo, YPG’yî zî xo rê sey gef/tehdîd vîneno. Aye semed ra zî bi çekronayîşê armancê Dewleta Tirkîya oy o ke kurdanê ma yê Rojawanê Kurdistanî bêpawitiş verado û dima zî cayê destê înan (kurdan) de bi çeteyan reyde dagir bikero.

Armanc xapênayîş o

Eke cayêk de yew pîyaameyîş est o, manaya ci aya ke, uca de di hetî est ê la temsilkarê Tirkîya sey ke înan bi xo enê prosesî nêdano destpêkerdişî, hetê binî (kurdan) red keno û vanê, ganî PKK bê şert û merc çekanê xo rono. Gelo madem wina yo çirê şima no proses da destpêkerdiş?  Şima heta nika vatêne, “ê (PKK) terorîst ê, ma terorîstan reyde nêruşenê, ma do înan biqedînê”. Ena ray se bîyo ke şima mecbur mendê înan (PKK) reyde ronîşê û prosesê aştîye bidê destpêkerdiş?

Ma vajê ke PKK’yî çekê xwu ronayê û vat “ma êdî vera Tirkîya şer nêkenê û ma xo fesîx kenê”, ena ray cayê Başûrê Kurdistanî ke şima PKK kerdo mana û îşxal kerdo do se bibê? Ancî hard û bajarê sey Efrîn, Girê Sipî, Serêkanîye ke şima Rojawanê Kurdistanî de îşxal kerdê do se bibê? Şima di hêzanê xwu ê cayan ra biancî û veng bikerê?

PKK serra 1978î de awan bîyo la bi se hezaran kurdê bêsûc û bêgunehê ke Dewleta Tirkîya verê awankerdişê PKK’yî kiştê, surgun kerdê, keyeyê înan rijnayê û warê înan vêşnayê do se bibê?

Se serrî yo ke Dewleta Tirkîya ziwan, kultur û nasnameyê kurdan qedexe kerdê, nameyê bajar û dewanê kurdan bedelnayê, demografîyê Kurdistanî vurnayê. Ena ray temsilkarê Dewleta Tirkîya qala nê zulm, jenosîd û terteleyan nêkenê, wurzenê vanê dewlete çi rey hesab nêdana çewî û çi rey zî nîno şîrovekerdiş, aye semed ra ganî şima (kurdî) bê şert û merc çekanê xo ronê.

Qisurê ma meewnê dewleta şima îlah nîya, ma kurdî zî evdê ci nîyê ke cira bîat bikerê. Ma kurdê seserra verê cû nîyê ke şima ma bi zûranê xo yê bêbineyan bixapînê.

Ena ray eke raşta ci zî şima wazenê kurdan rê aşt bibê, ganî şima verê cû hesabê ê zilmanê ke şima ardê serê şarê kurdî bidê û dima zî qanunê bingeyî de kurdan zî sey tirkan bikê hemwelatîyê seypî û heme heqanê kurdan yê sey ziwan, nasname û perwerde bidê. Nê eke şima wina nêkerî bêguman do rocêke peynîya zilmê şima zî bêro, çimkî seke ma sere de zî vat çîyêko bêpeynî çin o.