Hêzên Ewlekariya Hundirîn destnîşan kir ku ji saetên sibeha 25’ê cotmehê heta nîvro 40 gund, bajar, kargeh, bendên kontrolê û navendên petrolê bi dehan caran topbaran û bombebaran kirine. Di êdîşan de gelek kes birîndar bûn û zerarek gelek mezin pêk hatiye.
Navenda Ragihandinê ya Hêzên Ewlekariya Hundirîn a Herêma Bakur û Rojhilatê Sûriyeyê derbarê êrişên dewleta Tirk a dagirker ku ji serê sibeha 25 cotmeh 2024’an heta danê nîvro pêk hatine de daxuyaniyek belav kir.
Di daxuyaniyê de hat destnîşankirin ku êrîşên sîstematîk ên dewleta Tirk a faşîst li ser herêmê ranewestiyane, gelek navendên xizmetguzariyê bûne hedef û sivîlan jiyana xwe ji dest daye. Di daxuyaniyê de têkildarî cihên bûne hedefa êrişan û encamên wan ev agahî hatin parvekirin:
Kobanê
Artêşa Tirk a dagirker bi rêya balefirên bêmirov û biçek gelek navendên xizmetguzarî û tenduristiyê yên li bajarê Kobanê kirin hedef. Di êrişan de Nexweşxana El-Amel, Mîla Genim, Yarîgeha Kobanê, Salona Dawetê ya El-Furat, sîloyên genim û benda kontrolê ya hêzên a rêya Cerablusê hatin bombebarankirin. Di êrişa li ser sîloyên genim de karkerekê jiyana xwe ji dest da, 8 karker jî birîndar bûn.
Qamişlo
Balafireke keşfê 2 caran li pey hev baregeh û 2 caran jî noqteyeke hêzên me bombebaran kirin.
Amûdê
Balefirek bê mirov û biçek bendeke kontrolê ya hêzên me ya li ser rêya Amûdê-Dirbesiyê bombebaran kir.
Tirbesipiyê
Artêşa Tirk a dagirker nuqteyeke petrolê ya li nêzî qada petrolê ya Owêda careke din bi 2 topên hawanan kirin hedef. Balafireke bêmirov û biçek jî 2 caran qada petrolê ya Owêda bombebaran kir. Her wiha parzûngehên petrolê yên li nêzî zeviyên Owêda jî bi 17 êrîşên li pey hev bûn hedefa balafirên bê mirov.
Dêrik
Balafireke bê mirov û biçek nuqteyeke hêzên me kir hedef. Kargeheke torbeyan jî 8 caran li pey hev ji aliyê balafirên şer ve hate hedefgirtin.
Minbic
Artêşa Tirk a dagirker û çeteyên wê bi zêdetirî 25 topên hawanê êrişî gundên El-Mohsenlî, Ereb Hesen, Bozkeyêc, Um Celûd, Um El-Dadat, Um Adesa, El-Farat, El-Dendaliye, Qeriyt Wêran, El-Kewkli, El-Buweyhic û El-Mawasin kirin.
Her wiha artêşa dagirker gundên bakurê Minbicê topbaran kirin. Topên hawanê li malên sivîlan ketin û di encamê de 2 zarok bi giranî birîndar bûn.
Eyn Îsa
Artêşa Tirk a dagirker û çeteyên wê gundên Kitkaniya, Xirbet El-Beqer û Sîdon bi zêdeyî 10 topên hawanan kirin hedef.
Kampa Eyn Îsa jî bi 4 topên hewanê hate hedefgirtin.
Zirgan
Artêşa Tirk a dagirker û çeteyên wê gundên Muherremla, Aniq El-Hawa, Tel Hermel, Rebîat, Tel El-Werd û benzînxaneya Ebû Kermo ya li başûrê bajarokê Zigganê bi 86 topên hawanê kirin hedef.
Şehba
Artêşa Tirk a dagirker û çeteyên wê bi 4 topên hawanê careke din bajarokê Til Rifet topbaran kirin. Gundê Til Sewsan û derdora kampa Serdemê jî kirin hedef û di encamê de sivîlek birîndar bû.
Êrîş û bombebaranên dewleta Tirk ên li ser herêmên me bênavber dewam dikin.
Di 3 rojên dawî de
Dewleta tirk û komên wê yên paramîlîter piştî hevdîtina li Îmraliyê û êrîşa li Enqereyê êrîşên li ser Bakur û Rojhilatê Sûriyeyê zêde kirin. Di êrişên bi SÎHA, topan û balafirên şer de firin, nexweşxane, stasyonên av, ceyran, petrol û navendên kar û jîngeh kirin armanc. Di êrişan de navendên Til Rifet, Grê Spî, Dêrik, Qamişlo, Kobanê, derdora Çiyayê Qereçoxê, Amûdê, Rimêlan, Efrîn-Şehba, Minbic, Tirbespiyê, Siwêdiyê, Eyn Îsa û Til Temirê û gundên wan hedef hatin girtin. Di êrişan de zarok jî di nav de herî kêm 27 kes hatin qetilkirin û nêzî 40 kes jî birîndar bûn.
Li gorî daneyên ji nûçeyên ANHA’yê hatine berhevkirin, bîlançoya êrişên li dijî Bakur û Rojhilatê Sûriyeyê wiha ye:
23’ê Cotmeh:
* Dewleta tirk û komên wê yên paramîlîter bi çekên giran êrişî Kantona Efrîn-Şehbayê kirin. Di êrişê de yek jê zarok 2 kesan jiyana xwe ji dest dan û 6 kes birîndar bûn.
* Gundê Qizelî yê li rojavayê Girê Spî bi topên obûsê hate topbarankirin.
* Di encama bombebarana navenda Kobanê ya bi SÎHA’yan, 3 endamên Hêzên Ewlekariya Hundirîn birîndar bûn.
* Gundên Seyade, Ewn Dadat, Toxar û Derecê yên Minbicê bi çekên giran hatin bombebarankirin.
24’ê Cotmeh
* Gundê Um El Lêf ê Til Temir a Kantona Cizîrê bi obûsan hate bombebarankirin.
* Gundên Burc Qas, Kilotê, Meyasê, Zirneîtê, Soxanekê, Qinêterê, Aqîbê, Bênê, Tinibê, Merenazê, Malkiyê, Elqemiyê, Şewarqa, Til Rifet û derdora wê, Eyn Deqnê, Miniq, Şêxa Îsa, Hirbil, Samûqa, Til Medîq, Til Cîcan, Nêrebiyê, Radarê, Şealê û Xirbet Şealê yên Kantona Efrîn-Şehbayên hatin bombebarankirin.
* SÎHA’yan, Xaçerêya Efrînê ya li navenda Qamişloyê bombebaran kirin.
* SÎHA’yan Navenda tenduristiyê ya Xelîcê ya Qamişloyê bombebaran kirin.
* 2 navendên girêdayî Hêzên Ewlekariya Hundirîn a Qamişloyê hatin bombebarankirin. Di êrişa ewil de navenda Asayîşê ya li Taxa Enteriyê û di duyemîn de jî navenda asayîşê ya li Taxa Hilkoyê hedef hate girtin.
* Bajarê Kobanê cara 3’yemîn bi SÎHA’yan hate bombebarankirin.
* Stasyoneke ceyranê û derdora wê ya li bajarê Amûdê yê Kantona Cizîrê hate bombebarankirin.
* Derdora Çiyayê Qereçoxê yê li Dêrikê hedef hate girtin. Gundê Mêrka Mîra cara duyemîn hate bombebarankirin. Di êrişê de zirar gihişt malên şêniyên gund.
* Li dijî navenda Kobanê 4 caran êriş hate kirin û stasyona ceyranê hedef hate girtin. Ceyrana bajar qut bû.
* Depoya genim a li Taxa Enteriyê ya Qamişloyê û derdora rêbeja Hîzamê bi SÎHA’yan hate bombebarankirin. Liv û tevgera SÎHA’yan a li Qamişloyê didome.
* Balafirên şer Stasyona Petrolê ya Seîde ya li Tirpespiyeyê bombebaran kirin. Stasyona behsa xeberê di dawiya 2023’yan û di destpêka sala 2024’an de jî ji hêla dewleta tirk ve hedef hatibû girtin.
* SÎHA’yan piştî Çiyayê Qereçoxê û gundê Merkê Mîra, îcar jî gundên Tepkê û Girê Wira bombebaran kirin.
* SÎHA û balafirên şer stasyonên petrol, gaz û ceyranê yên Kantona Cizîrê bombebaran kirin. Navên stasyonên hatine bombebarankirin ev in; ‘Siwêdiyê, Tufle, Seîdiyê û Ûdê.’
* Febrîqeya gazê ya Stasyona Siwêdiyê hate bombebarankirin.
* Stasyona trenê ya li Taxa Siryanê ya Qamişloyê hate bombebarankirin. Di êrişê de xesarên madî çêbûn.
* SÎHA’yan careke din navenda Kobanê hedef girtin.
* Di encama bombarana li dijî Stasyona Siwêdiyê de 8 kes hatin qetilkirin. Her wiha zirareke mezin gihişt binesaziya stasyonê. Vê stasyonê xizmet dida saziyên xizmetê yên Kantona Cizîrê.
* Li Amûdê firina nan hate bombebarankirin.
* Stasyona ceyranê ya li Amûdê ku xizmet dida Kantona Cizîrê hate bombebarankirin. Di bombebaranê de xesarên madî çêbûn.
* Kobanê û derdora wê careke din hatin bombebarankirin. Di êrişê de noqteyên kontrolê yên Hêzên Ewlekariya Hundirîn, firin, stasyonên ceyranê û saziyên xizmetê hedef hatin girtin.
* Navenda Şîrketa Pêşxistina Çandiniyê (KPÇ) ya li Taxa Enteriyê ya Qamişloyê şevê din hate bombebarankirin. Di êrişê de 100 tonên ard şewitîn.
* SÎHA’yan bajarokê Rimêlanê bombebaran kirin. Bi awayeke hemwext jî Çiyayê Qereçoxê û gundê Eyn Tawîlê hatin bombebarankirin.
* Di êrişa li dijî Kobanê de endamê Asayîşê Hanuş Beke hate qetilkirin û ji hêzên ewlekariyê 3 kes jî bi giranî birîndar bûn.
* Di encama êrişên li dijî Til Rifetê de yek jê zarok 4 kes hatin qetilkirin.
* Navenda Asayîşê ya li gundê Elî Fero ya Qamişloyê hate bombebarankirin.
* Santrala ceyranê ya li Kobanê careke din hate bombebarankirin. Gundê Şiyûxa yê li rojavayê Kobanê hedef hate girtin.
* Gundê Hasda yê Amûdê hate bombebarankirin.
* Çoltarê Girê Spî û rêbeja M4’ê hate bombebarankirin.
* Di encama êrişa li dijî Kobanê de zaroka 3 salî ya bi navê Nadiya Mistefa birîndar bû. Di êrişê de xisareke mezin gihişt gelek saziyên xizmetê.
* Gundên Şeala, Dêr Qaq, Semoqa û Til Medîqê yên Kantona Efrîn-Şehbayê û Bendava Şehbayê hatin bombebarankirin. Hat zanîn ku heta niha herî kêm 150 topên obûsan li van gundan ketine.
* Stasyona petrolê ya li Tirbespiyê hate bombebarankirin.
* Stasyona petrolê ya li gundê Kêl Hesnakê hate bombebarankirin.
* Di encama êrişa li dijî stasyona Siwêdiyê ya li Dêrikê de 14 kes birîndar bûn. Kesên birîndar rakirin Nexweşxaneya Girkê Legê.
* Stasyona petrolê ya Zarbî ya li gundê Şelûmiyê yê Tirbespiyê hate bombebarankirin. Her wiha stasyona petrolê ya Babasî û nvaenda komkirina mazotê jî hatin bombebarankirin.
* Du bîrên petrolê yên li gundê Girê Berê yên Tirbespiyê hatin bombebarankirin.
* Gundê Oca yê Til Temirê hate bombebarankirin.
* Stasyona telefonê ya li gundê Kesebê yê Dirbêsiyê hate bombebarankirin. Ji ber êrişê telefon qut bûn.
* Gundên Mişêrfe, Dewalîb, Seyda û Muelek ên Eyn Îsayê, rêbeja M4’ê û Wargeha Eyn Îsayê hatin bombebarankirin.
* Derdora gundê Girziyaret ê Girkê Legê hate bombebarankirin.
* Gundên Dendeniyê, Ereb Hesen, Ewn Dadat, Toxar, Mişerfet, Biwêr û Seyade yên Kantona Minbicê hatin bombebarankirin.
* Zêdetirî 30 topên hewan û obûsan li gundên Qirtwêran, Kawilkî ve Hoteyê ketin.
* Bîrên petrolê yên li derdora Stasyona Ûdeyê ya li Tirbespiyê hatin bombebarankirin. Di encama êrişê de bîr temamî hatin tunekirin. Ji saetên nîvro ve stasyon cara 9’emîn hatin bombebarankirin.
* Gundên Kantona Efrîn-Şehbayê bi çekên giran hatin bombebarankirin. Her wiha derdora Kampa Serdemê ya li gundê Til Sosinê ku penaberên Efrînî lê dimînin jî hate bombebarankirin.
* Navenda Tenduristiyê ya Xelîcê ya li Taxa Hilko ya Qamişloyê hate bombebarankirin. Di êrişê de xesarên madî çêbûn û êdî nikare xizmetê bide. Li vê derê klînîkên zarokan ên li navenda tenduristiyê, nexweşiyên jinan, tedawiya diranan û beşa nexweşiyên hundirîn xizmet didan. Navendê her roj bi sedan kesên ji navenda Qamişloyê, çoltarê wê û Til Hemîs û çoltarê wê tedawî dikir.
* Gundên Qizelî, Qerfilî, Um Hewêş, Xirbet Elûş, Erîda û Kor Hesen ên Eyn Îsa û Girê Spî hatin bombebarankirin.
* Gundê Mişêrfê yê Eyn Îsayê û depoyên genim hatin bombebarankirin.
* Bîrên petrolê yên Ûdê yên Tirbespiyeyê careke din hatin bombebarankirin.
25’ê cotmehê
* Gundê Beniye yê Kantona Minbicê bi çekên giran hate bombebarankirin. Di encama êrişan de zarokê 11 salî Fereh Berho hate qetilkirin, zarokê 13 salî Ebdurehman El Berho û zarokê 8 salî Semîr El Berho birîndar bûn.
* Di êrişa li dijî depoyên genim ên li gundê Rovî yê Kobanê de 7 karker birîndar bûn.
Di heman demê de Mala Çavdêriya Mafên Mirovan a Sûriyeyê (SOHR) jî bi daxuyaniyekê ragihand ku di encama êrişên dewleta tirk ên li dijî Bakur û Rojhilatê Sûriyeyê de herî kêm 27 sivîl hatine qetilkirin.
