Wexto ke cinîyan waşt ke tewrê roniştişî dewaya Peymana Stenbolî bibê marûzê hêrişê polîsî bîyî.
Îqtîdarê AKP-MHPyî seba betalkerdişê Peymana Stenbolî dewa akerdbî. Dayîreyê 10. yê Mehkemeya Berze de roniştişê dewa dest pêkerd. Xeylêk avûkat û dezgehê cinîyan tewrê dewa bîyî.
Bi bahaneya ‘salone bîya pirr’ destûr nêdîya ke cinîyî û avûkatî debikewê salone. Serekê mehkeme dima ferman da ke cayêko veng çin o û cinîyî reyna kewtî salone. Xeylêk kesî teber de mendî.
Roniştişî ra verî dezgehanê cinîyan eşkerayîye daye û qisey kerd. Cinîyan pare kerd ke ê do qetî meverdê ke Peymana Stenbolî bêra betalkerdene.
Eşkerayîye ra dima polîsan hêrişê cinîyan kerd û cinîyêke dirbetin kerde. Cinîyan dest pê çalakîya roniştişî kerde û kewtî bînaya mehkeme.
