Mehkemeya Qanûnê Bingeyî dewaya Hedîye Atamane de bire daye ke dewlete wa tazmînat bido keyeyî.

Qezaya Erdîşî ya Wanî de 18ê teşrîna peyêne ya 2016î de polîsanê tirkan eştbî keyeyê Atamanî ser û banê keyeyî vêşnabî. Hedîye Atamane şewat de amebî qetilkerdene û mêrdeyê ci Ahmet Ataman zî îşkenceyî ra dima amebî destbendkerdene. Ahmet Atamanî rê cezaya zîndanî ya 18 serran û 4 mengan dîyabî. Îtîrazê avûkatan ê vera ceza zî amebî redkerdene.

Ahmet Atamanî têkoşînê xo yê heqî ra fek vera nêda û derheqê qetilkerdişî de muracatê Mehkemeya Qanûnê Bingeyî kerd. Mehkeme bira xo eşkera kerde. Mehkeme dîyar kerd ke wa dewlete tazmînatê qasê 390 hezar lîra bida Atamanî. Bire de ame vatene ke binpaykerdişê rûmetê merdimatîye serebût de qewimîyayo.

Avûkatê Atamanî Mahmut Kaçanî ard ziwan ke 2016 de Erdîş de qirkerdişêk ameyo kerdene la sereyê nê qirkerdişî ameyo girewtene. Kaçanî da zanayene ke derheqê polîsanê qirkeran de tehqîqat amebî akerdene la tehqîqat bênetîce qedîyayo. Kaçanî vat: “Derheqê bira Mehkemeya Qanûnê Bingeyî de ganî Serdozgerîya Komare ya Erdîşî tehqîqatêkê neweyî bikera. Mehkeme qebul kerd ke cezaya ke dîyabî Ahmet Atamanî binpaykerdişê heqanê merdiman o. Coka ganî newe ra prosesê muhakemekerdişê Atamanî dest pêbikero. La na bire bi hawayêkê eşkerayî vet werte ke Hedîye Ataman ameya qetilkerdene.”