Wekîlê HDPyî yê Çewlîgî Erdal Aydemîrî ard ziwan ke dewa Herdifî binê tehlukeyê vewresî de ya û semedê çareserkerdişê problemanê dewe veng da

Wekîlê Partîya Demokratîke ya Şaran (HDP) yê Çewlîgî Erdal Aydemîrî pê vernîyazêkê persî  problemê dewa Herdirfî berdê Meclîsî û waşt ke Wezîrê Binawanîye û Resayîşî Adîl Karaîsmaîloglu cewab bido vernîyazî.

Aydemîrî vat: “Dewa Herdifî ya qezaya Xorxolî ya Çewlîgî de zaf problemî estê ke dewijan û ma nê  zaf rey kiriştê rojdemê dezgehanê eleqedaran la heme bênetîce mendî. Bitaybetî her serre rayîrê dewe vewre ra bi mengan qefilnaye manenê. Seba ke rayîrê dewe guzergahê Koyê Sulbusî de yo tehlukeyê vewresî esto. Rixmo ke îmkan esto ke sey alternatîfî rayîrê dewe rayîrê Gêxî-Bilici rê bêro pabestene semedê nê gamêke nêerzîyaye. Pîya bi problemanê rayîrî dewe de tim ceyran şino û zexîreyê zimistanî xeripîyenê. Dewa ke bi citkarîye îdareyê xo kena kanalê awe zî çîn o. Şima do semedê rayîrî, birnayîşê ceyranî  û çareserkerdişê problemanê bînan ê dewa Herdifî çîyêk bikerê? ÇEWLÎG