Partiya Herêmên Demokratîk (DBP), 7emîn Kongreya Asayî li Navenda Bazirganiyê ya Cîhanê ya li Enqenreyê li dar xist. Hevserokê Giştî yê DBPê Keskîn Bayindir di kongreyê de axivî û got: “Divê her bajarê Kurdistanê rêxistiniya xwe mezintir bike. Rêya me dirêj e. Heta ku em aştiyê pêk tînin dê têkoşîna me bidome. Em ê ji vir û şûnde nîqaşa ‘Em ê Rêberê Gelê Kurd çawa rizgar bikin’ bimeşînin. Berxwedan, têkoşîn û azadî berpirsyartiya me ye. Roj roja xwebirêxistinkirin, berxwedan û çalakiyan e.”
‘Abdullah Ocalan dibêje civakê kom bikin’
Hevseroka Giştî ya DBPê Çîgdem Kiliçgun Uçar jî bal kişand ser hevdîtinên Şandeya Îmraliyê û wiha got: “Şandeya çûyî Îmraliyê û birêz Ocalan bangawaziyên pir girîng kirin. Divê kesek guhên xwe li van bangawaziyan negire. Partiyên hatine ziyaretkirin, divê bangî hilbijêrên xwe bikin. Divê ev pêvajo ber bi qebûlkirina daxwazên rewa yên gelê Kurd ve biçe. Li cihekî çareserî ewqas xwe dide ferzkirin de hewceye her kes berpirsyartiyê li xwe bigire. Em bi hev re biaxivin bê sedsala duyemîn dê li ser çi were avakirin. Di vê serdemê de divê kes berê gelan nede hev, divê em li hev bicivînin. Lê nabe ku Rojava weke hêmaya gefê were bikaranîn. Pêdiviya me bi rêyekê heye. Gava ewil a vê jî hatine cem hev e. Rejîma qeyûm, dewlet veguherand dewleta qeyûm. Heta li ser keda me jî bi polîtîkayên şer qeyûm hate tayînkirin. Ev pereyên ji berîka me tên derxistin dê ji bo ku derê bên xerckirin? Dê ji bo Rojava an Rojhilata Navîn bên xerckirin? Berê me jî li azadiyan, li aştiyê ye. Ne gotinên berê gel didin hev, divê gotinên mîna birêz Ocalan ên gelan lihev dicivîne bên kirin. Di serdema nû de li Kurdistan û Tirkiyeyê divê her kesên dibin dengê pêkvejiyanê bi destên hev bigirin û em ê banga vê bikin.”
Hevserokê Giştî yê DEM Partiyê Tuncer Bakirhan jî di kongreya 7emîn a DBPê de axivî û wiha got: “Heke pirsgirêkeke we hebe hûn çima hewl didin bi top, tifing, SÎHA û ÎHAyan çareser bikin? Hûn çima bi rêya diyalog, hevdîtin, axaftin û muzakereyan çareser nakin? Her roj şer, alozî û komkujî hene. Gelan bi hev nedin qirkirin.”
Tirkiye her roj êrîş dike
Tuncer Bakirhan, destnîşan kir ku pêwiste statûya gelê kurd hebe û wiha axivî: “Tirkiye hewl dide pêşî li statûya Bakur û Rojhilatê Sûriyeyê bigire. Her roj êriş dike. Bila bes sivîlan qetil bike. Bi vî awayî demokrasî nayê Sûriyeyê. Heke rejîmeke nû were avakirin ma bêyî Kurdan, Elewiyan, Xiristiyanan, Êzidiyan, Çerkesan, Erebên sekûler dibe? Heke wiha bibe em ê çawa jê re bibêjin rejîma nû? Ez bangî îktîdara Tirkiyeyê dikim; bihêlin bila gelên Sûriyeyê bixwe biryara pêşeroja xwe bidin. Çi karê we li wir e?”
‘Bajarê berxwedanê ye’
Tuncer Bakirhan bal kişand ser berxwedana Kobanê û wiha berdewam kir: “Hêza herî mezin a piştre çûye Sûriyeyê hûn in. Gelê kurd bi sedsalaye li xaka Sûriyeyê dijî. Efrîn, bajarekî dîrokî yê Kurdan e, Kobanê bajarê berxwedanê ye. Li Qamişloyê ereb, kurd û gelên din bi hev re dijîn. Lê tevî aloziyan jî şerê hev nakin û bi xwişk-biratî dijîn. Heke li wir pirsgirêka ewlehiyê hebe, wê demê li vir çi heye? Girtîgeh hatine tijekirin, li her kesê devê xwe vedike doz tên vekirin. Xelk bifikar e. Li welatekî wiha pirsgirêka ewlehiyê, demokrasiyê û azadiyê heye. Di nava vê krîza Rojhilata Navîn de we kengî dîtiye li Rojava jineke Ereb hatiye tacîzkirin an jî mudaxileyî jiyana wê hatiye kirin? We kengî dîtiye rêveberiya Bakur û Rojhilatê Sûriyeyê zirar daye mal û canê Ereb, Çerkez, Tirkmen an jî kesên din? Di van 11 salan de we kengî dîtiye kevirek hatiye avêtin? Lê gelên Tirkiyeyê dixapînin. Qaşo meseleya ewlehiyê ye. Meseleya ewlehiyê ya esasî, zîhniyeta we ya Kurdan tune dihesibîne ye. Vaye birêz Ocalan bi şandeya me re hevdîtin kir, dema guherîna vê zîhniyetê ye.
Bi SÎHA û ÎHAyan pirsgirêk çareser nabe
Tuncer Bakirhan bang li rayedarên Tirkiyeyê kir û xwest dest ji dijminantiya kurdan berdin û wiha pêde çû: “Kurd dijminên we nînin. Dev ji vê dijminatiyê berdin. Kurd pirsgirêka ewlehiyê nînin. Roja wê hatiye ku hûn ji vê xeletiya xwe vegerin. “Heke pirsgirêkeke we hebe hûn çima hewl didin bi top, tifing, SÎHA û ÎHA’yan çareser bikin? Hûn çima bi rêya diyalog, hevdîtin, axaftin û muzakereyan çareser nakin? Herin hevdîtin bikin, biaxivin. Ji kerema xwe bila wezîrên we biçin wê derê. Bila di cih de bibînin ka pirsgirêka ewlehiyê ye yan na. Kurd û gelên li wir çi dixwazin? Lewma banga me ji bo îktîdarê ew e ku bi Bakur û Rojhilatê Sûriyeyê re hevdîtinan, muzakereyan bike û daxwazên wan di cih de lêkolîn bike.”
Abdullah Ocalan 30 salin xwedî heman seknê ye
Ji 1’ê Cotmehê ve pêvajoyek heye. Pêvajo bi hevdîtina şandeya me ya bi birêz Ocalan re didome. Birêz Ocalan peyamên girîng da. Hûn li çendek şîrovekarên bipere yên dezgehên medyayê yên Tirkiyeyê nenihêrin. Ew tiştên din dibêjin. Birêz Oalan di sala 94’an de çi gotibe niha xwedî heman seknê ye. Çareseriyeke demokatîk, komareke demokratîk, destûreke bingehîn a Kurd jî li Tirkiyeyê xwedî heman mafan û pêkvejiyanê dixwaze. Dibêje jiyaneke wekhev. Lê ev îktîdar dibêje çi? Bahçelî diaxive. Birêz Edogan çi dibêje? Li Amedê çendek tişt got. Em pir zelal in û me îrade nîşan daye. Banga min ji bo îktîdarê ye; hûn çi dibêjin? Vaye ji gel re bibêjin ka hûn bi demokrasiyê re ne yan bi şer û tundiyê re ne? Gelo hûn li gel demokratîkbûna Tirkiyeyê û naskirina mafên gelê Kurd in?”
Şandeyê peyama Abdullah Ocalan parve kir
Tuncer Bakirhan, bal kişand ser hewldanên şandeya DEM Partiyê û wiha bi dawî kir :”Şandeya me çû serdana hemû partiyan û spasiya wan partiyan û derdorên civakî dikim. Şandeyê peyamên birêz Abdullah Ocalan yekser bi wan re parve kir. Em ê vê pêvajoyê jinêzve bişopînin. Bawer bikin ku rizgariya Tirkiyeyê muzakereyên demokratîk e. Aştî ye, çareseriya demokratîk e.Demokratîkkirina Tirkiyeyê ye. Di vê mijarê de muxalefet jî seknekî baş nîşan dide. Ez qala nêçîrvanên dengan nakim. Tu qîmeta wan nîne. Şûr nîşan didin, dê bibêjî qey gel dê stûyê xwe dirêjî ber şûrê wî bike. Hele li vî nîjadperest û faşîstî binêre. Ev çi welate ku em dibêjin aştî û demokrasî doz li me tên vekirin lê kesekê banga qetilkirina 25 milyon insanan bi şûr dike bi rehetî digere. Ma hiqûqeke wiha cihêkar dibe? Bi ço li destê kesê daxwaza aştiyê dikin didin û digirin lê faşîstê ku gefa qirkirinê dike û nîjadperestiyê dike tenê temaşe dikin. Wiha nabe.”
