Fîlmo belgekî “Dêsî Do Bêrê Rijnayene” yo ke behsê Fîgen Yuksekdag, Gultan Kişanak, Aysel Tugluk û Sîbel Yîgîtalpe keno aşma hezîrane de do bêro mojnayene.
Fîlmo belgekî “Dêsî Do Bêrê Rijnayene” yo ke bi destê rejîsoran Hebun Polat û Şerîf Çîçekî virazîya hezîrane de do bireso temaşekerdoxan. Fîlm de hîkayeyê 4 sîyasetmedaranê cinîyan estê. Rejîsorî bitaybetî kitabê Fîgen Yuksekdage yê bi nameyê “Dêsî Do Bêrê Rijnayene” û kitabê Gultan Kişanake yê bi nameyê “Rengê Morî yê Sîyasetê Kurdan” ra feydedar bîyî. Yeno zanayene ke Hemsereka HDPyî ya Kane Fîgen Yuksekdage serra 2016î ra nata Zîndanê Kandira yê Kocaelî de bindest a. Oncîna Hemsereka Şaredarîya Amedî ya Kane Gultan Kişanake nêzdî 7 serrî yo Zîndanê Kocaelî yê Tîpê Fyî de manena. Parlamentera HDPyî ya Kane Aysel Tugluke zî Zîndanê Kandira de xeylêk serrî mende. Nêweşîya ci “demansî” zîndan de aye ser o tesîro negatîf kerd. Dima ra Aysel Tugluke teşrîna verêna 2022î de veradîyaye. Fîlmê belgekî de yew zî nameyê Sîbel Yîgîtalpe vîyareno. Parlamentera HDPyî ya Amedî ya Kane Yîgîtalpe nika sûrgin de ya.
Kandira de fîlmkêşîyê nimitkî
Rejîsor Hebun Polat vano ke înan seba fîlmê belgekî pê kêneka Kişanake Evîn Kişanake, mêrdeyê Fîgen Yuksekdage Sedat Yuksekdagî, birayo pîl ê Aysel Tugluke Alaattîn Tuglukî tayê pêvînayîşî kerdê. Fîlm de tayê beşî Zîndanê Kandira de ameyî antene. Gama ke ê şîyî Kandira, uca de raştê xeylê zorîyan ameyî. Fîlmkêşîyî uca de bi nimitkî virazîyayî.
Ruhê xoverdayîşî
Fîlmê belgekî de bêguman xoverdayîşê cinîye bale anjeno. Temaşekerdoxî eşkenê fîlm de têkoşîno ke cinîyî vera îqtîdarê faşîstî rayra benê û ruhê xoverdayîşî temaşe bikerê.
