Lej her roje zêdîyeno, beno giran û xorî. Xora her cayê ciwîyayîşî de ma nayê vînenîme. Lej hetê sîyasî, sosyal ya kî ekonomî ra dewam keno. Hama kultur, ziwan û îtîqatî ser o kî polîtîkayê lejî bi raya taybete yenê ramitene. Demî nê lejê taybetî de kî en zêde cinî û domanan kenê çimanê xo. Waxto ke jû qomî ziwan û kulturê xo nêzona, o waxt xo ser ameyêne qomî ke zaf herey bena. Coka faşîzm en zêde kî xerepnayîşê ciwiyayîşê qomî ser o gurîno. Cinî en zêde kî cinîyê ke rêxistin bîyê înan ser o zorvajîya de pîle esta. Binêçimî girewtene cinîyan ra heta kistena cinîyan letê nê polîtîkayanê lejî ya. Yew kî herême bi herême na polîtîka rayanê cîyayan de vejîyena vernîya ma.
Qirkerdene û kokardena kurdan ser o sondî werdê. No lejê serranê peyênan coka honde giran vereno. Hama lejo taybeto ke kerdê dewr lejê xerepnayene û lejê poyneyena qomî yo. Serokê Dîyanetî Alî Erbaş kî sebanayê roja 10ê Hezîrane de şî Dêrsim. Serva caardena polîtîkaya asîmîlasyone gurîno. Dest ra çik ke yeno serva werte ra wedardayena kamîya Dêrsimî aye kenê. Dewlete vera nê hetî sewetê çokan serardena Dêrsimî gurîna. Ma nayê rind zonîmê. Her waxt ajan û tayê ke xo rotê serva pereyan zerreyê nê lejê taybetî de ca girewtî. Hama ewro bi raya kesê ke keyeyê cemî yê sûke de gurînê, îtîqatê Rêya Heqî yan elewîyan hedef cenê. Sewetê caardena rejîmê jû ziwan û jû bawerî Dêrsim de eşkera-dizda xorî ra gurînê. Meyîtanê qomê ma endî goreyê waştena dîyanetî darenê we. Jîyar-dîyarê ma bîyê hurendîya turîzmî. Coka çimê Munzurî kerdê xirave. Coka her wusar Dêrsim ser o neweyî her roje vejîyenê çapemenîya lejê taybetî de. Mezgê însonan de name, kamîye û tarîxê Dêrsimî wazenê bivurnê.
Unîversîteya Munzurî kî navenda nê lejê taybetî ra yew a. Gencê ke na zanîngehe de wanenê rastê hêrişanê cînsî yenê. Çond serrî yo wendekarî rastê tacîzî yenê ya kî hetê esker û polîsan ra hedef cêrînê.
Gulîstan Doku ya 21 serre, Dêrsim de wendekara perwerdeyê domanan ê Unîversîteya Munzurî bîye. 5ê çila 2020î ra nê hetî ci ra zonayîs çîn o. Kes nêzoneno Gulîstane rê se kerdî. Gulîstane ra avê ke, Gulîstanî ra tepîya ke na unîversîte de cinîyê gencî rastê hêrişanê lejê taybetî yenê. Gurekarî lejê kokardene na unîversîte de ca bîyê û gencan ser ra kurdan wazenê bêtaqat raverdê.
Rey xo rê pers bikerîme, çinay rê Dêrsim de honde çeyeyê cematan estê? Honde weqfê ke ameyî ronayene çi kar kenê, hetê aborîye ra kam poşt dano nînan. Wazenê Dêrsim kokanê xo ra biqurfîyo, zerreyê nê lejêtaybetî de ro bivileşîyo.
Teyna herêma Dêrsimî de nê pêro kurdî binê hêrişan der ê. Polîtikayê lejê taybetî her ca de yenê ramitene. Leweyê nînan de Dêrsim de pukeleka henêne esta, her ca cêna vernîya xo. Hetê ra koyî yenê bombarduman kerdene, hetê bînî ra koyan bi madenan a hedef gênê. Hem hardê şarî talan kenê, dewan kenê tol, hem kî xoza ra heta awe kenê qilerin. Nê talanî ra tepîya herême de beno ke cayo de pak nêmaneno ke mordem tey weşîye bikero.
Qomê Dêrsimî zîhnîyetê AKPyî rê zê virênî ewro kî qesê xo bivajo. Serva azadîya xo, sewetê îtîqat, ziwan û zagonê xo wayîr bivejîyo. Ziwanê ma, îtîqatê ma û hardê ma rê hêrişê nê sîstemê koleyîye nîya dewam bikerê. Xo vîr ra mekerê, bêvengîye merdene ya, coka vera zulmkaran kamîya Dêrsimî rê wayîr bivejîme. Dêrsim rê wayîrvejîyayene, kamîye, ziwan û îtîqat rê wayîrvejîyayene ya.
Waxtê nê hêrişan de kam ke beno vengê şarî înan ke cênê pê, erzenê hepisxane. Hefteyê virênî de 16 rojnamegerî ameyî tepiştene. Çapemenîya azade, çapemenîya kurdan wazenê bêveng bikerê. Bi na raye çapemenîya kenê hêrîşan, polîtîkayan, nê zulmî û zorvajîye ana rojdem, homete pêhesnena hedef girewte. Lejo ke wazenê zêdena xorî bikerê, nê lejî de vengê qomî birnenê. Nêwazenê hêrişanê qilerinan raya pêroye de cabicêro. Bi raya çapemenîya xo kî lejê xo yê taybetî vila kenê. Coka lejêtaybetî yê zulmkaran xorî yo. Gunê bi hîsdarî nêzdîyê rûmetanê xo bibîme. Wayîrvejîyayena xo, wayîrvejîyayena dormeyê xo, wayîrvejîyayena welatê xo ya.
