Dêrsim de şewato ke operasyonê artêşa tirke ya îşxalkere reyde dest pêkerdbi dewam keno. Şewatî rê mudaxele nêno kerdene.

Mabênê qezayanê Pulur, Xozat û Çemişgezekî yê Dêrsimî de dewa Kozkuçla de leşkeranê tirkan 20ê gulane de operasyono leşkerî dabi destpêkerdene. Operasyonî reyde herême de şewat dest pêkerd. Goreyê zanayîşanê ke dewijan ra ameyî girewtene dewleta tirke seba hewnakerdişê şewatî qet tênêgêrena.

Federasyonê Komeleyanê Dêrsimî (DEDEF) hesabê xo yê medyaya dîjîtale ser o mesajêk da û vat: ”Şewat cuya herême rê gef waneno. Ganî cade şewatî rê mudaxele bêro kerdene û gandarî bêrê pawitene.”

Walîtîya Dêrsimî şewatî ser o qet eşkerayîyêke nêdaye. 9ê gulane de zî heman herême de şewatêkî dest pêkerdbi û bêmudaxele 6 roşan ra dima şewat xo bi xo hewna şibi. DÊRSIM