Renato Tukacso ke Macarîstanî ra heta Kurdîstanî maruzê tedayanê leşkeran ê tirkan mend vat: “Ez do tim bêra Dêrsim. Rixmê nê meseleyan zî embazê mi yê rindî bîyî. Raştî û rindîyî sînoran nêşinasnenê.”

Renato Tukacs ciwanêko macar o. Tukacsî tim waştêne dinya ra bigêro coka unîversîte de beşê cografya weçîna. Cokast verî pê Erasmusî şîyo Almanya dima zî verê xo da Kurdîstanî.

Tukacsî verî kurdêko mêrdinij û dima zî kurdêko dêrsimij şinasnayî û meraqê Kurdîstanî kerd. Tukacsî vat: “Mi nînan ra fam kerd ke merdimê Kurdîstanî çend cîya yê û ney mi rê tesîr kerd. Ez ameya Kurdîstan. Verî mi waşt ez têna 2-3 rojan bimana la ez qasê mengêke Dêrsim de menda. Xozaya Dêrsimî zaf rind a. Mi Dêrsim de xeylêk merdimî şinasnayî. Dêrsim pê tarîx û merdimanê xo cografyayêka xoverdayox a.”

Tukacsî îfade kerd ke o têna di hewteyan Tirkîya de mendo û waşt Kurdîstanî ra bigêro. Tukacsî da zanayene ke o xeylêk cayan de bi taybetî Dêrsim de raştê tedaya polîs û leşkeranê tirkan bîyo.

Tukacsî vat: “Şewa verêne mi cayêke de kampe kerde. Serê sibayî qereqolêk de ez vindarnaya. Polîsan çend reyî mi rê pers kerd ke ez tîya de çi gêrena. Dima ez tepişta, fotografî makîna ra esteritî. No mi rê tecrubeyêko ecêb bi. Her cayê Dêrsimî de qereqolî estê. Merdim her ca de raştê qereqolan û leşkeran yeno.

Dêrsim de her ca de mi ra pasaport û nasname ame waştene. Çar hetanê Dêrsimî de sînorî virazîyayî û merdimî pê nasnameyî eşkenê derbazê zereyê Dêrsimî bibê. No zaf ecêbê mi şi. Ez do reyna bêra Dêrsim. Rixmê nê meseleyan zî embazê mi yê rindî bîyî. Raştî û rindîyî sînoran nêşinasnenê.” Çime: ANF