Ayşe Acar Başarana ke panalê “Dêrsim de cinîyî qala ekolojî kenê” de qisey  kerd ard ziwan ke şewatê daristanan semedê vengkerdişê herême yenê vetene û bi bedilnayîşê merkezanê bawerî yeno waştene ke bimbarekîya nê waran bêro çînkerdene.”

Meclîsê Cinîyan ê Dêrsimî Heyatê Konferansî yê Şaredarîye de bi sernameyê “Dêrsim de cinîyî qala ekolî kenê” panalêk organîze kerd. Panelo ke Moderatorîya ci Hemsereka Partîya Demokratîke ya Şaran (HDP) yê Dêrsimî Nurşat Yeşîle kerde Vervatoxa Meclîsê Cinîyan ê HDPyî û Wekîla Êlihî Ayşe Acar Başaran û Hemvervatoxa Komîsyonê Ekolojî yê Dêrsimî Menekşe Kizildere sey qalkerdoxe tewrê ci bîyî.

Panelo ke xeylêk cinîyî tewrê ci bîyî de verî Nurşate Yeşîl qisey kerd. Yeşîle ard ziwan ke meseleyê cinîyan û ekolojî mîyanê meseleyan tewr muhîman ê Tirkîya de ca genê û vat: ”Qirkerdişê vera cinîyan û xoza dewam kenê û îqtîdar semedê vergirewtişê nê meseleyan çîyêk nêkeno.”

Menekşe Kizildere zî ard ziwan ke ê sey HDPyî meseleyanê cinîyan û ekolojî pîya gene dest û wina dewam kerd: ”Meseleya ekolojî tesîrê cuya her kesî kena. 20 serranê peyênan de pîya bi polîtîkayanê îqtîdarî krîzê hewayî xidarêr bîyî. Tirkîya de heme estbîyayîşê ekolojî sey çimeyê ekonomî yenê vînayene yenê talankerdene.”

Ayşe Acar Başaran zî bale ante nêzdîbîyayîşê sîstemî yê vera şaran ser û vat: ”Qirkerdişê xoza zî leteyêkê şerê sîstemî yo ke herême de yeno kerdene. Şewatê ke Dêrsimî de yenê vetene xeylêk sebebê ci estê la înan ra tewr verên oyo ke herême bêro vengkerdene. Wazenê şarî erdê ci ra vejê û zereyê sîstemî de bifatisnê. Wazenê her çîyî eslê ci ra raqilnê. Dêrismî ser o xora polîtîkayê teybetî yenê rayaraberdene. Înan ra yew zî bawerî ya. Verî binê nameyê remformî de bi polîtîkaya heme bawerîyî sey yewbînan ê hêrişî ameyêne kerdene. Nika zî merkezê bawerîyan binê nameyê turîzmî de yenê akerdene. Ma zanê ke warê bawerî warê çimeyê ekonomî nîyê. Nika Çimeyê Munzurî tam zî wina ameyî dîyankerdene. Merkezanê bawerî bedilnenê ke asîmîle bikerê û bimbarekîya ci çîn bikerê.” DÊRSIM