Dêrsim de karkerê Şîrketa Xizmetanê Ceyranî ya Firat Aksayî (FEDAŞ) vera zemê meaşî yê kêmî çalakîyan serûber kenê.

Karkerî taxa Sihenkî ya merkezî de ameyî pêser û pê çepikan û sloganan nêrazîbîyayîşê xo ard ziwan. Karkeran çalakîye de vat: “Seba ke ma sey merdiman biciwîyê û nêmirê têkoşînê xo de qerardar ê.”

Parlamentera Partîya Çep a Keske ya Dêrsimî Ayten Kordu, Parlamenterê Dêrsimî yê verênî Alîcan Onluyî, Serekê EMEPî yê Dêrsimî Ergîn Tekînî, Hemserekê HDPyî yê Dêrsimî Ferhat Yildizî û Vervatoxa Partîya Çep a Keske ya Dêrsimî Eylem Yamaçe zî paştî daye çalakîya karkeran.

Sekreterê DÎSK/Enerjî-Senî Emîn Atsizî çalakîye de vat ke ganî waştişê karkeran bêrê caardene.

Parlamentera Dêrsimî Ayten Kordu pare kerd ke ê do tim hetê karkeran de bibê û vat: “Ma do pîya heqê nê prosesî ra bêrê. Heqê her kesî yo ke sey merdiman biciwîyê. Wa waştişê karkeran bêrê caardene. Ma do pîya ser bikewê.”