Dêrsim, Xarpêt û Çewlîg de xebatê weçînayîşî bi tewrbîyayîşê namzedan bêmabên dewam kenê.

Dêrsim

Namzeda Partîya Çep a Keske ya Dêrsimî Ayten Kordu, xebatkaranê Îtîfaqê Kede û Azadîye û Parlamenterê HDPyî yê Dêrsimî Alîcan Onluyî qezaya Çemişgezekî de esnafî zîyaret kerdî û dima dewanê Ekîrek, Sinsor, Dekge, Akturk û Karagedikî de dewijî zîyaret kerdî. Namzede Ayten Kordu dewan de yew bi yew dewijî pers kerdî û goş na meseleyanê înan ser.

Xarpêt

Namzedanê Partîya Çep a Keske ya Xarpêtî Savaş Erdoganî, Nûrşat Yeşîle û Sultan Yaraye Weqfa Cem Kulturî ya Elewîyan û Cemxaneyê Ehl-î Beytî zîyaret kerdî. Namzede Nûrşat Yeşîle û namzed Erdoganî zîyaretan de ard ziwan ke ganî cemxaneyan rê statuyê îbadetxaneyî bêro dayene û bawerîya elewîtîye bi qanûnan bêra pawitene.

Çewlîg

Namzedanê Partîya Çep a Keske Cemîle Turhalli Balsake, Faruk Aris û Omer Faruk Hulakuyî hêverî Komeleya Tavzî zîyaret kerde û dima zî îdarekarê Sîteya Sanayî ya Çewlîgî zîyaret kerdî. Endamê Meclîsê HDPyî yê Şaredarîya Çewlîgî zî zîyaretan de amade bîyî. Zîyaretan de goş nîya meseleyan ser û perspektîfê çareserîye yê Partîya Çep a Keske ame pêşkêşkerdene.