Konseya Asayîşê Neteweyî 12ê êlula 1980î de derbe kerde. Parlamento û qanûno bingeyî wedarîyayî. Nêzdî 650 hezar kesî ameyî destbendkerdene, 52 hezar kesî tepişîyayî û 49 merdimî ameyî dardekerdene. Hişmendîya derbekaran hema zî îqtîdar de ya.
Tarîxê dewleta tirke tarîxê derbeyan o. Her ke hêzê raverperestî û demokratîkî xurt bîyî, artêşa tirke derbe kerde. Nê derbeyan ra yew 12ê êlula 1980î de qewimîya. Konseya Asayîşê Neteweyî ya ke tede Kenan Evren, Nurettîn Ersîn, Tahsîn Şahînkaya, Nejat Tumer û Sedat Celasun estbî îradeyê şarî xesp kerd û îqtîdar girewt destê xo.
Maddeya 15. ameye dekerdene
Derbe de Suleyman Demîrel, Bulent Ecevît, Necmettîn Erbakan, Alparslan Turkeş nefî bîyî. Parlamento ame betalkerdene û Qanûno Bingeyî yê 1961î zî wedarîya. Herinda nê qanûnê bingeyî serra 1982î de qanûno bingeyî yo newî virazîya. Derbekaran seba ke nêrê muhakemekerdene nê qanûnê bingeyî de maddeya 15. dekerde. Qanûno Bingeyî yê 1982î hema zî merîyet de yo. Rejîmê Erdoganî goreyê nê qanûnî Kurdistan de polîtîkaya kolonyalîste rayra beno. Evrenî mêrasê derbe teslîmê Erdoganî kerd.
Erdal Ereno 17 serrî
Derbe de nêzdî 50 merdimî ameyî dardekerdene. Înan ra yew 17 serrî bî. Nameyê ci Erdal Eren bî. Eren bi hovî ame qetilkerdene. Kiştox Kenan Evrenî wina vatbî “Ma ey darde mekerê û weyî bikerê?”.
Astengkerdişê têgêrayîşê kurdan
Derbekaran bitaybetî burjuwazîyê tirkan ra paştî girewte. Armancê înan ra yew astengkerdişê têgêrayîşê kurdan û elewîyan bî. Yew zî na derbe ra pey Tirkîya dekewte binê tesîrê neo-lîberalîzmî. Yanî burjuwazîyî derbe ra feyde girewt. Yeno zanayene ke neo-lîberalîzm de “deregulasyon” esto. Seba burjuwazî êdî sînorkerdişo huqûqî wedarîya. Senî ke waşt, wina kar kerd û milkê xo zêdîna. Oncîna na derbe ra tepîya prosesê prîvatîzasyonî lez bî. Kolonîzekerdiş hîra bî.
