Parlamenteranê DEM Partî Ayten Kordu û Omer Faruk Hulakuyî qezaya Licikî ya Erzînganî de cigêrayîş kerd û eşkera kerd ke îhmal est o.

Qezaya Licikî ya Erzînganî de 13yê sibate de qezayê madenî qewimîya û 9 karkerî binê xirbeyî de mendî. Heta nika cenazayê 4 karkeran ameyî vetene la cenazayê 5 karkeran hema zî binê herre de yê.

Seba her hetê na facîa bêro eşkerakerdene meclîs de  “Komîsyonê Cigêrayîşî yê Qezayê Madenî yê Licikî” ame ronayene. Parlamenterê ke endamê komîsyonî yê 7-8ê gulane de Licik de cigêrayîş kerd.

Parlamenterê DEM Partî yê Çewlîg û Dêrsimî Ayten Kordu û Omer Faruk Hulaku yê ke tewrê cigêrayîşê Licikî bîyî Ajansê Mezopotamya rê qisey kerd.

Hulakuyî ard ziwan ke înan keyeyê kesanê ke dinyaya xo bedilnaye û binê herre de mendî, zîyaret kerdî û nê vatî: “Keyeyan vat înan vera tehlukeyê rijnayîşî îdarekarê şîrketî hîşyar kerdî la înan xebatê xo domnayî. Keyeyan vat îdarekarê şîrketî remayî şîyî teberê welatî. Ma do sey komîsyonî naye sero vinderê. Tesbîtê ma yo verên oyo ke zaf barkerdiş bîyo, coka xijbîyayîş bîyo. Licik de îhmalo eşkera est o. Rixmo ke qelişîyayîş est o tedbîrî nêameyî girewtene. Ma do heyna hewte îdarekaranê şîrketî goştarî bikerê.”

Ayten Kordu zî ard ziwan ke waştişê keyeyan oyo ke wa berpirsîyarî vejîye meydan û wîna vat: “Wezîrîyî û eleqedarî pêro cewabê persan erzenê yewbînan. Çew berpirsîyarîye nêgeno xo ser. Zafê persan nînê cewabkerdene. Komîsyon hîna zaf xebatanê teknîkî keno la hetêkê na mesela sîyasî û polîtîk o. No pîya bi merdim û herra ci qirkerdişê xoza yo. No zîhnîyet ganî bêro bedilnayene. Şîrketê Anagoldî polîtîkaya îqtîdarî ya ‘vêşan biverde, bibestê xo’ ya rayra beno.”