21ê adara 1995î de de yanî roşanê gandarbîyayîşê şarê kurdî de dayîke Emîne Ocake seba rojbîyayîşê kênaya xo kerdêne ke maseyan bipewjo. Na roje lajê xo Hasan Ocakî maya xo rê têl kerd û ci rê vat ke rew yeno. Labelê ne Hasan ame, ne maseyî ameyî pewtene û ne zî rojbîyayîş ame fîrazkerdene. Şarê kurdî key rîyê keyfweşîye dîyo ke dayîke Emîne zî rîyê ci bivîno. Hasan Ocak 21ê adare de bi destê polîsan ame destbendkerdene û 5 rojî destbendkerde mend. Keyeyê ey dewlete ra pers kerd, selahîyetdaran cewab da ke “destê înan de nîyo”. Dima ra keyeyî her rayîr şuxilna û 58 rojî dayîke Emîne seba ke cayê lajê xo bizano her ca ra pers kerd. A ameye destbendkerdene û kutene, zaf zehmet ant. Dewlete yewna çîyêk qebûl nêkerd û cayê Hasan Ocakî înkar kerd.
Dewijan 26ê adare de Beykoz de herêma Dedelerî ya dewa Buzxaneyî de leşa Hasan Ocakî ya bêgane dîye. Dima ra dewlete ameye hayîdar kerdene û derheqê nasnameyê ey de tehqîqatî dest pêkerd. 15ê gulane de keyeyê Hasan Ocakî goreyê raporanê Dezgehê Tipî yê Edlî nasnameyê ey dîyar kerd. Raporê otopsî eşkera kerd ke Ocak ame xeniqnayene û qetilkerdene. Rîyê ey seba ke nêro naskerdene, amebî letekerdene û leşa ey de rêçê îşkenceyî est bîyî.
Kerdoxê qetilkerdişî
Keyeyê Hasan Ocakî tayê şahidan reyde pêvînayîşî kerdî û dîyar kerd ke Ocak tewr peyên Beşê Têkoşînê Vera Terorî de ame dîyayene. Keyeyê ey xeylêk reyî îlankerdişê sucî kerd, labelê kerdoxê qetilkerdişî nêameyî dîyarkerdene. Mehkemeya Heqanê Merdiman a Ewropa seba ke Tirkîya heqê ciwîyayîşî yê merdimî binpay kerdo, cezaya tezmînatî daye tirkan.
Hasan Ocak û Ridvan Karakoç
Nameyê Hasan Ocak û Ridvan Karakoçî seba têkoşînê azadîye wayîrê cayê girîngî yê. Sayeyê înan serra 1995 de çalakîyanê “Dayîkanê Şemeyî” dest pêkerd. Têna Hasan Ocak û Ridvan Karakoç nê, xeylêk hemwelatîyê demokrat û welatperestî destbendkerdişan de ameyî qetilkerdene. Dayîke Emîne bi desan serran têna seba lajê xo nê, seba têduştîye, azadîye, demokrasî, edalet û heqanê merdiman têkoşîno bêhempa kerd. Xoverdayîşê ey eslê xo de xoverdayîşê şarê kurdî, xoverdayîşê Kurdîstanî bî. Emîne Ocake rûmetê Dêrsimî bîye. Ganî Dêrsim verê vîrameyîşê aye de vileyê xo çewt bikero. Dayîke Emîne mêrasê Ana Zarîfa, mêrasê Bese kiriştêne. Senî ke vera zulmkarî Ana Zarîfa xover da, bedelo giran da, Dayîke Emîne zî vera zulmkar û serdestî xover da.
Komara demokratîke
Bi desan serrano xoverdayîşê Dayîkanê Şemeyî domîyeno. Merdimîye ameye seserra XXI., hema zî kerdoxê qetilkerdişanê ke destbendkerdişan de qewimîyayî, eşkera nîyî. Ganî nê welatî de edalet û huqûq êdî bêro caardene. Coka konseptê “komara demokratîke” xeylê muhîm o. Seserra XX. de komara yewperest, tedaker, înkarker, nîjadperest, otorîter û kanpereste est bîye. Na seserre de komel paweno ke komare bireso demokrasîyê rastikênî. Seba awankerdişê komara demokratîke verî aştîye û komelo demokratîk hewce keno. Na çarçewa de prosesê Aştîye û Komelê Demokratîko ke Rayberê Şarê Kurdî Abdullah Ocalanî dest pêkerd bale anjeno.
