13ê teşrîna verêne de bi vengdayîşê DEM Partî Amed de do Mîtîngê Azadîye bêro kerdene. Xebatê mîtîngî xeylêk bajaran de dewam kenê. Rixmê qedexeyê walîtîye xebatî yenê rayraberdene, bajar de kelecanêko xurt zî est o. Hemsereka DBPyî ya Amedî Sultan Yaraye derheqê mîtîngî de qisey kerd.

Sultan Yaraye ard ziwan ke ê do 13ê teşrîna verêne de rixmê qerarê qedexî pîya bi pêro şarî warê mîtîngî de bê û nê vatî: “Rojhelatê Mîyanênî de şerêk qewimîyeno û ver bi newe ra dîzaynkerdişê Rojhelatê Mîyanênî game bi game yeno averşîyayene. Seba ke no şer biqêdîyo û aştîye bêra ganî kurdî Rojhelatê Mîyanênî de heqanê xo yê meşruyan bifînê dest. Bi destfînayîşê destkeweyanê kurdan peynîyê şeran zî do bêro. Semedê nê zî ganî aştîya zerî biba û adresê nê zî Îmrali yo, Birêz Ocalan o. Ma reyna vanê ke hinî tehamulê ma nêmend, wa tecrîd bêro wedaritene û meseleya kurdan bêra çareserkerdene. Îqtîdar prosesî mîyanê zemanî de vila keno, wazeno şarê kurdî bixapîno. Butçeya girde ya Tirkîya semedê şerî yena xerckerdene. Wa hinî butçe şerî rê nê semedê hûzûrî bêro xerckerdene. Şarê kurdî raştîyêka na herre ya. Ma bi polîtîkayanê zext û asîmîlasyonî çin nêbenê.”

Sultan Yaraye bale ante qedexeyê walîtîye yê panc rojan ê semedê çalakî û aktîvîteyan ser û vat: “Ma destûrê mîtîngî girewt û dest pê xebetan kerd. No qerarê qedexeyî keyfî û sîyasî yo. Hetê ci yê huqûqî çin o. îqtîdar mîtîngo ke şar tede waştişanê xo ano ziwan qedexe keno. Îqtîdar heqê qiseykerdişî nêdano kurdan. Heqê ma yo demokratîk yeno astengkerdene. Ma nê qebul nêkenê. 13yê teşrîna verêne de se beno wa bibo ma do meydanan de bê, ma mîtîngê xo bikerê ke kurdî û dostê înan bi heyecanî pawenê. Waştişê ma yo verên azadîya fîzîkîye ya Birêz Ocalanî ya. Tecrîd çend xorî beno rijnayîşo komelkî zî xorî beno. Coka ganî ma semedê azadîya Birêz Ocalanî têkoşînê topyekunî bikerê. No mîtîng zî cayê nê yo. Ma veng danê şarê xo, bêrê ma pêro vera tecrîdî semedê azadîye biqîrê.”