Tepişteyanê dewaya PKK-PAJKî 27ê teşrîna peyêne ya 2023yî de dest pê grevê vêşanîye kerdbî û 4ê nîsane de zî safhaya diyîne ya grevê xo dabî destpêkerdene. Çarçewa safhaya diyîne de tepişteyî mehkemeyan û pêvînayîşan boykot kenê.

Grevê tepişteyan reyde keye û merdimê înan zî Nobetanê Edaletî de yê û nika zî panc şaristanan de çalakîya ”Veng bidê azadîye” kenê.

Afîfe Kartala ke lajê ci Muhammed Kartal tepişte yo çalakîkeranê Nobeta Edaletî ra ya. Dayîke Afîfe ANFyî rê qisey kerd û pare kerd ke ê pêro tepişteyanê sîyasîyan sey ewladê xo vînenê.

Dayîke Afîfe ard ziwan ke ganî her kes vengê tepişteyan bido eşnawitene û vat: “Di mengî yo ma nêeşkenê tepişteyan ra agahîye bigêrê. Xora bi serran o Birêz Ocalanî ra xebere nêna girewtene. Ganî tecrîdê vera Birêz Ocalanî cade bêro wedaritene. Tecrîd sûcê vera merdimatî yo. Hem tecrîdê vera Birêz Ocalanî hem zî tecrîdê vera tepişteyan ganî biqedê.”
Dayîke Afîfe keyeyê ke hetê ewladanê xo yê tepişteyan de nîyê rexne kerdî û vat: “Tepişteyî seba azadîya ma xo ver danê, rewşêka winayêne de ê senî keyeyê xo de ronişenê? Ganî pêro merdim û keyeyê tepişteyî tewrê çalakîyanê ma bibê. Lajê mi 4ê nîsane ra verî mi rê mektubêke şawitbî la mektube 10 rojî verî resaye destê mi. Na mektube nefes da mi. Eke Îmraliyî ra zî wina vengêk bêro, komel do nefes bigêro. Sey 2019î ganî ma xo rêxistin bikerê û vejîyê waran. Eke ma wina nêkerê hêrişî do bizêdîyê.

Her ke ma vanê aştîye, hukmatê tirkî zî vano şer. Seba welatê xo û tepişteyan ma vejîyenê waran. Eke ma wurzê we, çîyo ke ma nêeşkê dest bivisnê çin o. Eke ma wurzê payan ser do tecrîdî zî bişiknê.”