Dayika Taybet înan di 19’ê Kanûna sala 2015’an di dema qedexeya derketina kolanan a li navçeya Silopî ya Şirnexê de ji hêla hêzên ewlekariyê ve hat qetilkirin û cenazeyê wê 7 rojan li erdê ma. Dayika Taybet Înan di 9’emîn salvegera qetilkirina xwe de li kolana lê hatibû qetilkirin hat bibîranîn. Bîranîn, bi pêşengtiya Tevgera Jinên Azad (TJA) û Rêxistina Partiya Wekhevî û Demokrasiyê ya Gelan (DEM Partî) ya Silopiyayê ve pêk hat. Malbata dayika Taybet, Parlamentera DEM Partiyê ya Şirnexê Newroz Uysal Aslan, endamên Meclisa Dayikên Aştiyê, akîvîstên TJA’yê û hevşaredarên navçeyan tev li bîranînê bûn.
Beriya bîranînê girse heta li ber deriyê mala Taybet Înanê meşiya. Malbata Înan bi wêneyên dayika Taybet girse pêşwazî kir. Piştre jî girse derbasî kolana dayika Taybet lê hatibûn qetilkirin bû.
Dayika Taybet bû sembol
Parlamentera DEM Partiyê ya Şirnexê Newroz Uysal Aslan di bîranînê de axivî û li gel Dayika Taybet hemû kesên di dema qedexeyan de hatin qetilkirin bi bîr anî. Newroz Uysal Aslan, wiha got: “Em ê vê hovîtiya li vê kolanê hatiye kirin ji bîr nekin. Di şexsê dayika Taybet de em hemû şehîdan bibîr tînin. Di sala 2015’an de li Cizîrê, Silopiya, Nisêbîn û Hezexê rûreşî û komkujiyeke mezin hate kirin. Di şexşê Dayika Taybet de mirovahî li vê kolanê mir. Cenazeyê wê 7 roj û 7 şevan li vê kolanê ma. Me di wî wêneyî de hovîtî dît. Dayika Taybet bû sembola vê hovîtiyê. Me di komkujiya Roboskê de, me di qetilkirina Dayika Taybet de, me di qetilkirina Ayşe Buruntekîn de dît ku ev dewlet dijberiya ax û nasnameya vî gelî dike.”
Bi domdarî Newroz Uysal Aslan bi lêv kir ku heta ku kujer hesabê didin dê têkoşîna wan bidome û wiha dirêjî da axaftina xwe: “Ev Plana Têkbirinê ku dabûn destpêkirin, hêj didome. Di qetilkirina Dayika Taybet de yek kujer nehate darizandin. Îro dewleta tirk xwedî li van sûcan derdikeve û diparêz e. Lê em van sûcan qebûl nakin û ji bîr jî nakin. Heta ku kujer hesabê didin em ê têbikoşin. Dilê me îro bi êş e. Lê em dizanin bi qetilkirina Dayika Taybet nekarî vîna gelê Kurd tune bike û serî pê bidin tewandin. Heta ku hesab tê dayin dê têkoşîna me bidome.”
Dayika Ayşe û Mele Hesen jî bi bîranîn
Piştî axaftinan, girse bi dirûşmên “Şehîd namirin” derbasî mala Dayika Taybet bû. Piştî bîranînê girse çû serdana malbata Dayika Ayşe Buruntekîn û Mele Hesen ên di dema qedexeyan de hatine qetilkirin û ew bi bîr anîn.
