Endamê Lijneya Darayî ya li Parlamentoya Herêma Kurdistanê Umer Gulpî ku girêdayî fraksiyoan Komeleya Dadgerî ya Kurdistanê ye, li Silêmaniyê der barê dahat û xerca hikûmata Herêma Kurdistanê de daxuyaniyek da.
Umer Gulpî destpêkê behsa dahata mehane ya Hikumeta Herêma Kurdistanê kir û got; “Her meh Hikumeta Herêma Kurdistanê ji firotina neftê, 570 milyar dînar bi dest dixe. Ev yek salê dike 6 tirilyon û 840 milyar dînar. Herwiha dahata mehane ya gumrik, bac û hevkariya hevpeyaman jî, 520 milyar dînar e. Bi giştî dahata Herêma Kurdistanê salane dike 14 tirilyon û 80 milyar dînar.”
Gulpî got ku dahata mehane ya Herêma Kurdistanê 1 tirilyon û 90 milyar dînar e, xerca mehane ya muçeyê bi temamî û ya wezaretan jî di nav de 995 milyar dînar e. Gulpî diyarkir ku li gor vê yekê 95 milyar dînar ji dahata mehane ya herêmê zêde dike û ji Hikumeta Herêmê re dimîne.
Endamê Lijneyê Gulpî ragihand ku Herêma Federal a Başûrê Kurdistanê bi vê dahatê dikare mûçeyê karmendên herêmê bê ku bibire, belav bike û wiha got: “Ji ber dewamkirina gendelî û qaçaxçitiyê, hikumet nikare vê pêngavê biavêje.”
Gulpî li ser pirsek nûçegihanê Rojnewsê ya ‘Ger lihevkirina Bexda û Hewlêr pêkwere, wê çi bandora xwe li ser zêdebûna dahata Herêma Kurdistanê bike’ jî wiha bersiv da: “Eger lihevkirina Bexda û Hewlêrê were bicih kirin, wê mehane dahata herêma Kurdistanê nêzî 200 milyar dînar ji ya niha zêde bike. Lê ne Bexda û ne jî Herêma Kurdistanê, naxwazin ev lihevkirin bikeve meriyetê.”
