Dewa Bilexşî ya qezaya Kercewsî ya Êlihî de 22yê hezîrane de 9 kesî amebî destbendkerdene û nînan ra hîrê dadîyê kurdî amebî tepiştene.

Hemsereka ÎHDyî Eren Keskîna ke hîrê dadîyê kurdî Zîndanê Êlihî de zîyaret kerdê, derheqê rewşa dadîyan de agahîyî dayî ANFyî.

Keskîne pare kerd ke hîrê dadîyî wextê sewqê zîndanî de raştê cigêrayîşê rûtî ameyê û binê şertanê xiraban de tepişîyenê.

Eren Keskîne bale ante ser ke dadîyan ra Emîne Kaya se ra 71 astengdar a û vat: ”Dadîyan mi rê vat ke ê semedo ke raştê cigêrayîşê rûtî ameyê şermayê û xemgîn bîyê. Nê dadîyî zîndan de binê germîya 40 derece de koxûşêk de tepişîyenê ke de tede klîma çin a. Dadîyî hewte de ancax reyêke eşkenê awa werdişî bigêrê la a zî dadîyan rê qîm nêkena. ”

Keskîne da zanayene ke aye di doman û çar cinîyê ke govende ra tepişîyayê zî zîyaret kerdê. Keskîne pê hesna ke sewqê zîndanî ra dima nînan rê deyîrê nîjadperestî bi zorî ameyê goşdarîkerdene û nê 6 kesî zî binê şertanê xiraban de tepişîyenê.