Şaristanê Ciwanroyî yê Rojhelatê Kurdistanî de 6 ciwanî hetê hêzanê Îranî ra ameyî remnayene û destbendkerdene.
Ciwanro de sekbanî serê bînayanê hukmatî de ameyî cakerdene. Xeylêk taxan de sereştişê keyeyan dewam keno. Polîs şarî terorîze keno.
Seba Burhan Îlyasîyo ke amebî qetilkerdene, yewşeme merasîmê cenaza ame kerdene. Merasîmî ra dima Muxafizanê Şorişî yê Îranî eşt keyeyê Îlyasî ser. Sereştiş de Halîd Îlyasîyo ke birayê Burhan Îlyasî yo ame destbendkerdene.
Dîya zanayene ke wextê sereştişî de hêzanê dewlete keyeyî rê gef wendo û seba Halîd Îlyasî vato ‘Bişens o ke nêmerdo.’
Merasîmê cenaza ra dima roja yewşemeyî 6 ciwanê bînî hetê dewleta Îranî ra ameyî remnayene û aqîbetê înan nêzanîyeno. Nameyê 6 ciwanan wina yê: Ûsame Yoûsefî, Îdrîs Badîeî, Yahya Abdî, Yaser Hedayatî, Shahîn Khodamoradî û Îdrîs Fathî.
Goreyê Rêxistina Heqanê Merdiman a Îranî 16ê êlule ra nata tewr tay 476 kesî hetê hêzanê dewlete ra ameyê qetilkerdene ke 64ê înan doman û 34ê înan zî cinî yê û 100 çalakîkeranê tepişteyan ser de zî gefê dardekerdişî est o.
