Piştî agahiyên li ser nûkirina 3 mehên din a ˋCezayên Dîspilînêˋ li ser Rêber Abdullah Ocalan ji hêla desthilatên Tirkiyeyê ve, bi sedan ciwanên Helebê li dijî pergala êşkence û qirkirinê ya li Îmraliyê meşiyan. Tevgera Ciwanên Şoreşger a Sûriyeyê bi beşdariya şêniyan û ciwanên Helebê, bi posterên Rêber Abdullah Ocalan, alên tevgera ciwanan, Yekitiya Jinên Ciwan û meşaleyan, meşek li dar xist.
Meş ji pêş hola civînan a 8ˋê Adarê ya li taxa Şêxmeqsûdê ber bi beşa rojhilatê taxê ve bi berzkirina diruşmên “Bê Serok Jiyan Nabe”, “Bimire faşîst û îxanet” û “Ji bo Rêber Abdullah Ocalan azadiya fîzîkî” bi rê ket.
Li wir rêvebera Yekitiya Jinên Ciwan Reşa Mulhim bi navê Tevgera Ciwanên Şoreşger û Yekitiya Jinên Ciwan axivî. Reşa Mulhim bal kişand ser çalakiya fedaî ya her du şehîdan Rojger Hêlîn û Asya Alî li Enqereyê û diyar kir ku ew çalakî bersivdana gelê Kurd li hember qirkirina Rêber Abdullah Ocalan tê re derbas bibe ye.
Reşa Mulhim anî ziman ku ji ber metirsiya faşîsta Tirk ku rûbera şoreşa Kurdistaniyan li Bakurê Kurdistanê belav bibe êrişî demokratan dike û di bin gefa çekê de 3 şaredarî xesp kirin.
Reşa Mulhim bang li hemû şopdarên fikrên Rêber Abdullah Ocalan kir ku dakevin qadan û banga pêkanîna azadiya fîzîkî ya Rêber Abdullah Ocalan û bidawîkirina pergala êşkence û qirkirinê bikin.
