Meclisa Ciwanan a Partiya Wekhevî û Demokrasiyê ya Gelan (DEM Partî) li Eywana Dawetan a Geterler a navçeya Rezan a Amedê bi dirûşma “Vejînek Ciwan” 1’emîn Kongreya Asayî pêk anî. Bi hezaran ciwan tev li kongreyê bûn. Di kongreyê de ciwanan pankart vekirin û bi daxwaza azadiya fîzîkî ya Rêberê PKK’ê Abdullah Ocalan û çareserkirina pirsgirêka kurd bi rêyên demokratîk dirûşm berz kirin û peyam dan. Ciwanan, bi dirûşma “Bijî berxwedana zindanan” jî bal kişandin ser çalakiya greva birçîbûnê ya li girtîgehan. Di heman demê de dirûşmên “Bê Serok jiyan nabe” û “Bijî Serok Apo” li eywanê olan dan. Hevserokê Giştî yê DEM Partiyê Tuncer Bakirhan, gelek parlamenter û nûnerên rêxistinên civaka sivîl ên bajar jî tev li kongreyê bûn.

‘Em çalakgeran silav dikin’

Kongre, bi deqeyek rêzgirtinê ya ji bo kesên di têkoşîna azadî û demokrasiyê de jiyana xwe ji dest dayîn dest pê kir. Piştre jî bi hezaran beşdaran bi yekdengî dirûşma “Şehîd namirin” berz kirin. Ji endamên dîwanê Parlamentera DEM Partiyê ya Mêrdînê Bêrîtan Guneş bal kişand ser çalakiya greva birçîbûnê ya ku girtiyan bi daxwaza azadiya Abdullah Ocalan daye destpêkirin û wiha got: “Çalakiya greva birçîbûnê ya girtiyan a ji bo azadiya Abdullah Ocalan gelek girîng e. Em silavên xwe ji girtiyên azadiyê û kesên di greva birçîbûnê de ne re dişînin. Heta niha me li ber faşîzmê serê xwe netewandiye. Ji niha pê ve jî em ê serê xwe netewînin. Em ê rêxistiniya xwe mezin bikin. Em ê bersivekê bidin kesên hewl didin bi rêya şerê taybet me tune bikin. Em ê rêxistiniya xwe mezin bikin.”

Silav ji Rêberê Gelê Kurd Abdullah Ocalan re

Endama Meclisa Ciwanan a DEM-Partiyê Senem Erîş jî di kongreyê de wiha got: “Em kesên li zindanan ketine girevê silav dikin. Em dayikên di ‘Nobeta Edaletê’ de û ciwanên, kampûs û li kolanan li ber xwe didin silav dikin. Em ciwanên welatparêz û ciwanên ji bo pêşeroja azad li ber xwe didin silav dikin. Silav ji Rêberê Gelê Kurd Abdullah Ocalan re.”

‘Em li vir in’

Erîş, da zanîn ku tevî hemû astengiyan ew ê li ber xwe bidin û wiha pêde çû: “Li dijî hemû polîtîkayên şerê taybet dîsa jî em li vir in. Li dijî faşîzmê, em ê bi bawerî têbikoşin. Têkoşîna me di pêvajoyeke girîng û dîrokî de ye. Rêhevalên me yên zindanan ji bo tecrîda li ser Rêberê Gelê Kurd Abdullah Ocalan bi dawî bibe ev pêvajo dane destpêkirin. Tecrîd her ku diçe giran dibe. Faşîzma AKP-MHP’ê tecrîda mutleq û îşkenceya derûnî bêhtir kurtir kirine. Me vîn û nasnameya xwe di paradîgma û felsefeya Rêberê Gelê Kurd Abdullah Ocalan de dît. Em li dijî gotinên vala yên weke dawiya têkoşîn, paradîgma û felsefeya wan hat, bi bawerî li vir in. Me serî netewand û em ê serî netewînin. Ev kongre, coş, bawerî û vîn dê tecrîdê bişikîne û faşîzmê hilweşîne. Ev gaveke nû ya destpêka têkoşîna ciwanan e.”

Endamê Meclisa Ciwanan Mehmet Halîs Saykan jî bal kişand ser rola sereke ya ya ciwanan û wiha got: “Enerjî û dînamîzma dikare her cureyên zehmetiyan têk bibe. Her tişta ku me ji têkoşînê dûr dixîne, di esasê xwe de ji me diqewime. Şertê sereke ya bihêzbûnê, rêxistinbûn e. Divê em tev li nûnertiya nasnameya ku sînoran nas nake û tiştên ku her kes dibêje mimkin nîne pêk bê pêk tîne bibin. Mîrateya pîroz a ji me re hatiye hiştin em dikarin bi vî awayî bidomînin. Ya ku dikeve ser milê me serkeftin e, serkeftin e.”

Kongre bi gerandina govend û bi strana bi dawî bû.