AKPyî şerê vera kurdan pê rutkerdişê Ekîn Wana ke Mûş de şehîd bîye, da destpêkerdene. Verê cû îqtîdarê bînî zî kerdbî, la AKPyî hêrişê vera cenazayan bi teşhîrkerdişê cenazeya Ekîn Wane de dest pêkerd. Serranê 90an de goş, sere, çiceyê cinîyan ameyêne cêrakerdene û yewîya ci ameyêne xirakerdene. O wext nê caardişî bi nimitkî ameyêne kerdene. Wezîrê Karanê Zerreyî Suleyman Soyluyî çend serrî verê cû vatbî: “Wa parçe parçe bikerê û medyaya komelkî de vila bikerê.” Nê vatişî zîhnîyeto hovî kerd har û seke qetilkerdiş û teşhîrkerdişê bedenê cinîyan normal bibo komel de fehmêko winasî awan kerd. Kamî o wext vatêne ke do rewşa Tirkîya wina biba! Esasê xo de vatiş û têgêrayîşê ê wextî camêrdo serdest kerd wehş û nika bi şimitişê gonîya cinîyan daxî mird nêbenî.    O wext bi nimitkî bedenê cinîyan ameyêne teşhîrkerdene. La ewro AKP bi komelî dayo qebulkerdiş. Bêvengîya vera qetlîaman ra netîceyêka winasî vejîyena. Polîtîkaya cinîyan nika bîya babeta bingeyîn a munaqaşayanê AKP-MHP-Huda Par-Yenîden Refahî. Cinîyanê kurdan Şorişê Rojawanî de û vera cerganê DAIŞî de rolê pîlî girewtî xo ser û cinîyanê kurdan bi cesaretê xo dinya de veng da.

Bedenê Ekîn Wane

Serra 2015î de fotografê bedenê zitî yê gerîlaya YJA-Starî Ekîn Wane hetê dewleta tirkan ra ameyî parekerdene. Reyna sey naye sewbîna çîyê bînî zî qewimîyayî. Bedenê cinîyan ameyî teşhîrkerdiş û rotiş. Kurdistan de polîtîkaya tecawuzê bi unîformayan aver kewte, goristan ame texrîbkerdiş û nê caardişan ra zî hîssê xo yê nijadperestî mird nêkerdî, cenazeyî lete lete kerdî û bi kargo û postayan şirawîyayî keyeyanê înan. Nê çîyê ke merdim bi vatişan hîs keno ra hovê winasî mird benê û hîssê heywanê hovî înan de ca beno.

Caardişê DAIŞî  Nijadperestê ke nê caardişan kenî zî bi dînperestî yenê pirrkerdiş û caardişanê xo yê xiraban û hovan binê nameyê dînî de nimnenê. DAIŞî Sûrîye de binê nameyê îslamî de sereyê merdiman lete kerd û cinîyî bazaran de rotî. Heta bi nê çîyî de sînor nêmend, domanê 6 serreyan mare kerdî û î bazaran de zî rotî. Tirkîya de zî no caardiş verê cû nimitkî ameyêne kerdene. Bado ke zîhnîyeto dînperest AKP bî îqtîdar, êdî raşteyî mendî cemaet û dînperestan rê.

Kênaya Yusuf Zîya Gumuşelî

Kursê dîn, cemaet û terîqatan de êdî bi eşkera domanê ke seba wendişî şinê nê cayan, raştê tacîz û tecawuzan yenê. Êdî AKPyî teşhîrkerdişê bedenê cinî û domanan kerdo normal û bi komelî dayo qebulkerdiş. Bêvengîya vera nê caardişan zî nê semedî ra yo. Qewimîyayîşê zewecnayîşê domana 6 serrî ya awankarê Weqfê Hîranurî Yusuf Zîya Gumuşelî vîran de newe yo. Gumuşelî kênaya xo bi murîdê xo Kadîr Îsteklîyî reyde zewecnabî.

Shani Louke ameye remnayene

Çend rojî verê cû Têgêrayîşê Xoverdayîşî yê Îslamî yanî bi nameyêko bîn partîya siyasî ya Fîlîstînî Hamasî cinîya bi nameyê Shani Louka 30 serrî remnaye û bedenê aye peynîya kamyonêkî de teşhîr kerd. Shani Louke hêrişê hemverê festîvala aştîye de nêzdîyê sînorê Xezayî de hetê endamanê Hamasî ra ameye sey esîr girewtene û bedenê ci peyê kamyonêkî de raşte bi raşte ame teşhîrkerdene. Dadîya Shani Louke ya hemwelatija Almanya Rîcarda Louke dîyar kerd ke a bawer kena ke kênaya aye sax a û destê aye de delîlî estê. A vana ke Shani Louke nêweşxaneyêkê Xezayî de yena dermankerdene.

Kam ca de beno wa bibo cayo ke tede zîhnîyeto pederşahî, camêrdîye est a; teşhîrkerdişê bedenê cinî, tacîz û tecawuzî zî est o. Êdî rayîrberê dînperest û pederşahîyan her tewir caardişê vera cinîyan kerdê fermî û ferman danê camêrdanê ke kuçe ra derbaz benê, hêrişê cinîyan bikerê û her caardişê ke zerrîya înan wazena serê cinî û domanan de pê bîyarê.

Jîna Emînî û Armita Girawend

Ma dînperestê Îranî dîyî. Ma dî Jîna Emînîye senî hetê polîsanê exlaqî yê Îranî ra ameye qetilkerdiş. Tewr peynî paytextê Îranî yê Tehranî de domane Armita Girawende îstasyonê metroyî de wexto ke waşt şêra mekteb, hetê hêzanê Îranî ra ameye îşkencekerdene û hema zî koma de ya. Nê heme çîyan rayîrberê bi exlaq û dînperestê bibawerî kenî. Nika tîya de merdim nê persî pers keno; gelo kamcî exlaq û bawerîya kamî raşt a? Nê dînperestan şarî dînî ra durî fînayî û vanê semedo ke bawerîya şima çinî ya qetlê şima zî helal o. Nê hovê harî nêewnenê ruçikanê xo yê lêşinan û destanê xo yê gonînan. Welatê ke tede dîn nîno munaqaşakerdiş zî asîyenê û welatê ke bi dînî yenê rayîrberdiş zî raşte de yê. Êdî tîya de însîyatîf ê merdimî yo. Kamcî bawerî û kamcî exlaq şima qerar bidê