Tepişteyanê Zîndanê Cinîyan ê Şakranî qetilkerdişê Jîna Emînî şermezar kerd û wina veng da: “Ma xoverdayîşê cinîyan selam kenê. Biciwîyo têkoşînê cinîyan. Cinîye, Cuye, Azadîye.”

Tepişteyanê Zîndanê Cinîyan ê Şakranî bi mektubêke paştî daye çalakîyanê vera qetilkerdişê Jîna Emînî.

Cinîyan mektube de wina vat:

“Têna Îran de nê pêro dewletanê faşîstan de vera cinîyan qirkerdişê sîstematîkî dewam kenê. Nê kerdişî hetê mezgê serdestîya camêrdan ra yenê kerdene. Ewro Tirkîya de hişmendîya AKP-MHPyî, sey rejîmê malayan cuye cinîyan rê kerda zîndan. Tirkîya de cinîyî her roje hetê camêrdan ra yenê qetilkerdene. Qirkerdişê cinîyan wextê îqtîdarê AKP-MHPyî de zêdîyayî.

Ma sey cinîyanê nê zîndanî qetilkerdişê Jîna şermezar kenê. Ganî pêro cinîyî vera nê qetilkerdişî vengê xo berz bikerê. Ganî ma xoverdayîşê cinîyanê Îran û Rojhelatî têna meverdê û wayîrê nê xoverdayîşî vejîyê. Ma xoverdayîşê nê cinîyan selam kenê. Biciwîyo têkoşînê cinîyan. Cinîye, Cuye, Azadîye.”