Cinîyî Êlih û Mersîn de Sifreyê Rîyêerdî de ameyî yewca û qala polîtîkayanê şerî kerde.
Cinîyan pare kerd ke şer bi xizanîye û vêşanîye do abigêro cinîyan û ganî verî cinîyî vajê ke wa şer vindero.
Têgêrayîşê Cinîyan ê Azadan (TJA) qezaya Tarsusî ya Mersînî de fitar da. Aktîvîsta TJA Zana Çobane fitarî ra dima qisey kerd û bale ante polîtîkaya şerî ya îqtîdarî ser. Zana îfade kerd: ”Îqtîdar menga Remezanî de zî şer keno, no zî mojneno ke AKP dînî seba xo şuxilneno. Ma zananê ke şer bi xizanîye û vêşanîye do abigêro cinîyan û ganî verî cinîyî vajê ke wa şer vindero.”
Êlih de zî Meclîsê Cinîyan ê HDPyî, TJA û Platformê Kede û Demokrasî fitar da cinîyan. Vervatoxa Meclîsê Cinîyan Ayşe Acar Başarane, Hemşaredara Êlihî Songul Korkmaze, TJA, Meclîsê Mayanê Haştîye û xeylêk cinîyan pîya fitarê xo kerd. Fitarî ra dima qala girîngîya menga Remezanî ameye kerdene.
