Platformê Cinîyan ê Şahmarane yê Mêrdînî ard ziwan ke serranê peyênan de Kurdistan de tecawuz û kişîyayîşê cinîyan zêdîyenê û vat: “Nê cînayetî hetê dewlete ra yenê teşwîqkerdene.”

Platformê Cinîyan ê Şahmarane yê Mêrdînî derheqê qirkerdişê Sakîne Kultur û Remzîye Apaydina ke qezaya Depe ya Xarpêtî de hetê sernator Nîhat Cavî ra amebî qirkerdene de eşkerayîye daye.

Xeylêk cinîyî tewrê eşkerayîye bîyî. Derya Akyole nameyê platformî ser o eşkerayîye wende. Akyole vat: “Seba ke şîdetê vera cinîyan bêceza verdîyeno tecawuz û kişîyayîşê cinîyan zêdîyenê. Serranê peyênan de zî Kurdîstan de sûcê winasênî yê unîformakerdeyan zêdîyayî. Sebebê ney o serek zî polîtîkayê şerê taybetî yê dewlete ê. Sakîne û Remzîye hetê unîformakerdeyan ra ameyî qetilkerdene. Nê cînayetî polîtîkayê şerê taybetî yê vera cinîyanê kurdan ê. Nê cînayetî hetê dewlete ra yenê teşwîqkerdene. Ganî ma vera ney bêveng nêmanê û seba ke cinîyêka bîne ma destî ra nêşora ma do têkoşîn bikerê.”