Çimeyê Munzurî yê qezaya Pulurî yê Dêrsimî bi projeyê peyzajî yenê talankerdene. Rixmê heme nêrazîbîyayîşan xebatê ci dewam kenê. Çimeyanê Munzurî yê Pulurî yê Dêrsimî de yeno waştene ke projeyêkê peyzajî bêro kerdene. Sere de dêrsimijî xeylê hemwelatij û rêxistinî vera projeyî nêrazîbîyayîşê xo mojnenê. Şar û rêxistinî dîyar kenê ke Çimeyê Munzurî seba elewîyan cayêko fîraz o û nêwazenê ke Çimeyî bibê cayê rantî. Makîneyê karî Çimeyanê bimbarekan rijnenê û betonan rijnenê.
Do pirdêk bêro viraştene
Çimeyê Munzurî de binê nameyê ‘viraştişê dorme’ de beton ame rijnayene û kerrayê mermer ameyî cakerdene. 5ê tebaxe de binê nameyê ‘viraştişê dorme’ de makîneyê karî kewtî Çimeyanê Munzurî û xebatê talankerdişî dîya destpêkerdene. Xebato ke dîya destpêkerdene hema zî dewam keno. Her çiqas ke xeylê herême û rêxistinanê komelkî yê sivîlî ra nêrazîbîyayîş bêro mojnayene zî proje bêmaben dewam keno û yeno pawitene ke serê Çimeyanê Munzurî de pirdêk bêro viraştene.
Sere de her çiqas ame vatene ke do ‘cayê xozayî nêrî texrîbkerdene’ zî rijnayîşê mîyanê Çirra Munzurî dewam keno. Nika zî betonê derg û kerrayê mermer ameyî cakerdene.
Tehqîqatêk dîya destpêkerdene
Çend roje verê bi vengdayîşê Heyetê Pawitişê Munzurî vera ‘projeyê peyzajî’ çalakîya zîncîrê merdiman amebî kerdene. 81 kesî tewrê çalakîye bibî. Serdozgerîya Komare ya Pulurî derheqê 81 çalakîkeran de tehqîqatêk daye destpêkerdene. DÊRSIM
