Aşma Gulane aşma şehîdanê cangorîyan a, aşma dayanê fedakaran a û aşma roşanê ziwanê Kurdan a. Gulane bi raştî zî aşmêka bi gulan a. Heme aşman zêdehîrê xoza bi gul û vilan xemelnena û rîpêşê aye newe ra rengnena. Bi weşkahîya xo ruhê însanan de hîsanê pozîtîfan virazena û bereketa heme ganeyanê rî erdî rê.  Însanî na aşme de verê xo danê xoza û pişike înan bi oksîjenêke pak yena degirotişî. Hema vacê her merdim xozaya ke bi gul û vilikan ameya xemelnayîşî ra hes keno/a la zehf tay merdimî qedrê xoza zanê û zehfê merdiman bi qaso ke qedir danê pere û meqamê berzan nîmeyê ey zî nêdanê xozaya ke heme veranê xo bexşê înan kena.

Kapîtalîzm xoza xerepna

Her serre însanan bereket û weşkahîya gulane ra nehfêke baş girotêne la qedrê aye nêzanayêne. Çi heyf ke heta çîyêk destê merdimî ra nêvecîyo merdim qedrê ey zî nêzano. Dimayê nê vîrusê korona ke destpêkê zimistanî ra Çîn ra vecîya û temamê dinya de bi vila zehf akerde ame dîtişî ke lazimo zêdeyê peran û meqaman qedir bideyo xoza û heme ganeyanê rî erdî ke Homayî ey zî sebebêke ra xuliqnayo. Ma zanê bi destpêkerdişê pergala kapîtalîste dir zehf zerar dîya xoza û ganeyê bînan ê rîerdî ro. Bi zihnîyet û kerdişanê kapîtalîzmî serre bi serre aşme bi aşme atmosfer zêdetir xerepîya, feleketê hewa û derdorî pêsero nêbî kêmî. Kapîtalîzmî hem qiwet û aqilê însanî hem zî heme çimeyanê xoza rayîrê sermayeyê xo de xerc kerd û helbet bê şik hetkarîya pîle zî pergalê netewedewletan ra girot û hema zî gêno.

Xetereyê xoza û ekolojî ser

Ma vînenê nê vîruso ke bi qasê mîsqalêke yo ters visto zerreyê heme însananê rî dinya û çi rengî ra benê wa bibê, çi neteweyî ra benê wa bibê verê înan dîyayo di çîyan; pakîya dest û rî û keye de mendiş. Bi raştî beno ke pakîya dest û rî û keye de mendiş ma nêweşîyêke çorrî ra yan vîrusêk ra bipawo la heta zihnîyet û pergalê kapîtalîst û netewedewletan, zihnîyet û pergalê dagirkeranê ke her gam û saet xo rê heq vînenê bikoyê war û welatanê şarê bînan raşte ra nêrê wedartişî ne xetereyê merdimahî ser ne zî xetereyê xoza û ekolojî ser nêdarênê we.

Zordestîya xo domnenê

Bi qaso ke pergalê kapîtalîst û dagirkeran zilm û zordestîya xo merdimahî ser de domnenê û zerar danê xoza ro, vîrus verê kerdişanê înan de çinê yenê hesebnayîşî. Nê wextê ke heme însanî kewtê keyeyanê xo û wazenê xo vîrusê kiştoxî ra bipawê warê Kurdan de mezelî yenê xirakerdiş, şaristanê înan yenê desteserkerdiş û yenê koçberkerdiş,  îradeyê înan yeno desteserkerdiş û yenê hepiskerdiş, ziwanê înan yeno qedexekerdiş û bênasname yenê verdayîş, erdnîgarî û tarîxê înan yenî texrîbkerdiş û no heme zilm û zordestîya dagirkeran zî bi destek û paştîya kaptalîzm û netewedewletanê dinya yenî kerdiş.

To keye de rehet nêverdeno

Gef û xetereyê vîrusî çiqas merdimî ser de berdewam bikero go serêke di serî berdewam bikero û derbas bibo la gef û xetereyê dagirkeran ne serrêke yo ne di serrî yo ne hîri serrî yo bi seyan serrano ke şarê ma ser de berdewam keno. Ancî merdim eşkeno bi hîjyenê şexsî û keyede mendiş xo vîrusî ra bipawo la pergalê dagirkerî ne to keye de rehet verdeno ne zî teber de. Vano yan ti go pergalê mi, ziwan û kulturê mi rê xizmet bikerê û mi rê koletî bikerê yan zî ti go koçberî, mezel û hepisxane ra hebêke weçînê.

Milyonan însanî ameyê kiştiş

Hema vace şeş aşmî yo heme dinya mîyanê tersê vîrusêk de keleyena û bi ya bo qedênayîşê vîrusê korona dir go pirsgirêkêk nêmano la lazim o merdimahî bifikirîyo, hela xetereyê korona merdimahî û pergalê ekolojî rê zêde yo yan ey emperyalîst, kapîtalîst û dagirkeran. Tenê di şeranê ke Rochilato Mîyanênî de hetê dagiker û emperyalîstan ra ameyê viraştişî de bi milyonan însanî ameyê kiştiş, hepiskerdiş û koçberkerdiş.

Dûmanê febrîqeyanê kapîtalîst

Nê serranê peyînan de Sûrîye çimanê ma ver da. Nizdê milyonêke însanî bi tûtî, cinî û extiyaran wa ameyê kiştişî û bi milyonan însanan ca û wareyanê xo ra koçber bîyê. Bi atmosfero ke tenê bi dûmanê febrîqeyanê kapîtalîst sermayedaran yeno lîşinkerdişî dinya leze bi leze ver bi germbûnî û bêawî şona.

Çimeyê heme şer û nêweşîyan

Wareka rayvistişanê sey tenduristîya dinya, rayedaranê ke hakimê dinyayê û heme însanan hesasîyeto ke hemverê vîrusê korona mojnenê ra hemverê emperyalîst û dagirkeranê şerwaştan û şervetan û cinawirê kapîtalîzmî zî bimojnayne ra. A gamî go bi sehezaran nê bi milyonan însanî kiştiş û koçberkekerdişan ra feletyayne, go xoza pake û dinya nikay ra qat bi qat ciwîyîndarî rê bayne. Ne welatî ameyêne dagirkerdiş, ne şar warê xo ra ameyêne koçberkerdiş, ne şerrî ameyêne meydan ne zî însanî ameyêne kiştiş. Yeno dîtiş ke çimeyê heme şerran, xirabî û nêweşîyan pergalê kapîtalîst, emperyalîst û dagirkeran o. A gamî lazim o têkoşînê însananê heme dinya zî hemverê nê herîrî cinawiran bo.