Hemserekê HDPyî yê Amedî Zeyyat Ceylanî vat ke Amed û bajaranê bînanê Kurdistanî de wextê erdlerzî de ruhê paştîdayîşî derbasê pratîkî bî.

Ceylanî wina qisey kerd: “Serê şarê ma yo ke raştê erdlerzî ame weş bo. Dejê înan dejê ma yo. Yeno vatene ke heta nika 10 bajaran de teqrîben 40 hezarî merdim û Amed de 400 merdim şî heqîya xo. Ma hêvî kenê ke na hûmare nêzêdîyena. Yew çîyo bîn bi hezaran merdimê ma binê xirban de pawenê ke bêrê xelisnayene.”

Ceylanî qiseykerdişê xo de ruhê paştîdayîşê Amedî ser o wina vat: “Nê herran de kulturê têkoşînî yê 50 serran esto. HDP pê hîsê heq, huqûq û edaletî tîya de estbîyayîşê xo domneno. No kultur ruhê HDPyî bîyo. No kultur demê baş û xirabî de goreyê îmkanan rol gêno xo ser. Wextê bêtere de bi des hezaran merdimê ma şîyî rehmet. Ganî yo ke destkarîya lezkanî bibîyêne. Ma binê şertanê zimistanî de ciwîyenê. Merdimî bê xeyme û betanîya nêeşkayî biciwîyê. Ganî yo hetkarîye bi acîlîye biameyêne kerdene. Amed, Êlih, Sêrt û bajaranê Kurdistanî yê bînan de ruhê paştîdayîşî derbasê pratîkî bî. Her komelo ke xo rêxistin keno, hemberê bêteran de refleksêkê lezî mojneno. Ma Amed û bajarê bînî yê Kurdistanî bi nê ruhî rêxistin kerdî.”