Hemserekê HDPyî yê Amedî Zeyyat Ceylanî vat: “Eke komel û muxalefet hol bêrê rêxistinkerdene, şansê AKP-MHPyî nêmaneno ke nêşoro.”

Hemserekê HDPyî yê Amedî Zeyyat Ceylanî bale ante hêrişanê îşxalî û operasyonanê qirkerdişê sîyasîyî ser û pare kerd ke vera faşîzmî xoverdayîş esto.

Serekkomarê Tirkîya Erdoganî no hewte reyna Rojawanî rê gef wend û vat ke ê hê amadekarîya îşxalêkê neweyî kenê. Hetê bînî ra başûrê Kurdistanî de zî hêrişê îşxalî yê dewleta tirke dewam kenê û vakurê Kurdistanî de zî operasyonê qirkerdişê sîyasîyî zêdîyayî.

Hemserekê HDPyî yê Amedî Zeyyat Ceylanî derheqê babete de ANFyî rê qisey kerd.

Ceylanî îfade kerd ke hêzê herêman ê sey Sûrîye, Îran û Iraq hemkarîya polîtîkayanê Tirkîya yê vera kurdan kenê û vat: ”Şerê Yewinî yê Dinya de şarê armenî, êzidî û sûryanîyî ameybî qirkerdene. Nika zî kurdî binê tehlukeyê qirkerdişî de yê. Ewro bê destûrê Amerîka û Rûsya çew nêeşkeno bombayan bierzo Dihok, Şingal û Efrînî. Îqtîdarê AKP-MHPyî nê prosesî de hêzanê herêman û mîyanneteweyîyan de pê kerdo ke netîce bigêro. Îqtîdar armanc keno ke teber û zere de kaosan virazo û bi nê hawayî îqtîdarê xo rê dewam bikero. Nika warê ekonomî, sîyasî û komelkî de krîzê pîlî estê, rijîyayîş esto. Xora nê şertan de seba ke ê kurdan sey astengîye vînenê, dest pê hêrişanê wina hîra û têmîyanan kenê.”

Ceylanî ard ziwan ke qedexeyê sîyasî, tedaya serê zîndanan û tecrîdê Îmraliyî dewam keno la xoverdayîşêko komelkî zî esto. Ceylanî vat: “Polîtîkayê faşîzanî ser nêkewtî. Ma pê bawer ê ke tewiro xurt ê komelî do pîl bibo, serrê 2022 û 2023yî bibê serrê aştîye û demokrasî. Eke komel û muxalefet hol nêrê rêxistinkerdene, şansê AKP-MHPyî nêmaneno ke nêşoro. Ma pê bawer ê ke xîretê ma do biresê netîceyêke û ma serkewtişî bîyarê şaranê Kurdistan û Tirkîya.”