Qezaya Kanîreşî ya Çewlîgî de çawişê pisporî yê bi nameyê Ferhat K.yî cinîya bi nameyê R.O.ya ke semedo ke çawiş kewt peyê domanê ci nêrazîbîyayîşê xo mojna derb kerd û ci rê gefî wendî.

Qezaya Kanîreşî ya Çewlîgî de Keyeyanê TOKÎ yê Turgut Ozalî de çawişê pisporî yê tirkan Ferhat K. kewt peyê domanan. Domanan ra yew tersa û rema hetê dadîya xo.

Dadîye R.O. vera çawişî nêrazîbîyayîşê xo mojna. Çawişî verî cinîye rê gefê mergî wendî dima zî a derbe kerde. R.O. wedarîyaye nêweşxane, raporê derbe girewt. Cinîye gerreyê çawişî kerd.

R.O pê vîdeoyêk qala hêrişî kerd û vat: ”Êyê  ke ganî şarî bipawê wina hêrişê ma kenê. Ganê ma binê tehlukeyî de yo. Ewro pirnika mi şikit, siba se keno bewlî nêyo.”

Hetê bînî ra Komîsyonê Cinîyan ê Baroyê Çewlîgî hesabê xo yê medyaya sanalî ra da pêhesnayene ke ê do teqîpkarê na babete bê. ÇEWLÎG