Şirnex de cerdevan Ramazan Babato ke menga gulane de domana 16 serre S.G. rê tecawuz kerd ame tepiştene.
Fîrdevs Babata ke wextêkî ra nata vînîbîyaye bibîye, di rojî verî cenazaya ci Çemê Hezilî de amebî dîyene û çarçewa tehqîqatê serebûtî de Sadî Babat, Ramazan Babat û Ahmet Babat ameybî destbendkerdene. Ahmet Babatî îfade de sûcê xo îtîraf kerdbî û qetilkerdişê Fîrdevse ra tepişîyabî.
Ame îdîakerdene ke Fîrdevse pê çeka kekê Ahmet Babatî Ramazan Babatê cerdevanî kişîyaya. Narey zî eşkera bî ke Ramazan Babatî menga gulane de domana 16 serre S.G. rê tecawuz kerda û Hazim Babat û Şeyhmus Babatî xîret kerdêne ke tecawuzî mîyan bikerê.
Dima ke Ajansê Mezopotamya no serebûtê tecawuzî ard rojdem serebûtêko newe eşkera bî.
Çarçewa tehqîqatî de 23ê tebaxe de Ramazan Babat, birayê Hazim Babatî Şeyhmus Babat, babîyê S.G. E.G. û dadîya ci M.G. ameyî destbendkerdene.
Cerdevan Ramazan Babat sûcê ‘hêrişê cînsî yê vera domane’ ra tepişîya û erzîya zîndanî.
Şeyhmus Babat, babîyê S.G. E.G. û dadîya ci M.G. hema Qereqolê Cendirmeyan ê Qilebanî de îfade danê.
S.G. seba îfade verî ameye berdene bi Merkezê Çimdarîya Domanan ê Mêrdînî, uca ra zî ameye berdene bi Merkezê Çimdarîye û Vergirewtişê Şîdetî yê Şirnexî (ŞONÎM).
