Tevgera Jinên Azad (TJA) li navenda Mûşê li ser Pira Siloxa (Mûrat) Newroz bi meşaleyan pîroz kir. Di çalakiyê de dirûşmên “Bijî Serok Apo” û “Jin, jiyan, azadî” hatin berzkirin, peyama Rêberê Gelê Kurd Abdullah Ocalan a ji bo jinan 8ê Adarê şandibû hat xwendin. Parlamentera Partiya DEMê ya Mûşê Sumeyye Boz ji bo Newroza 19ê Adarê li bajêr bê lidarxistin bangawazî kir.
Li navçeya Tetwan a Bedlîsê bi pêşengiya TJAyê ji Mala Mamosteyan heta qada Fûarê meşek meşaleyî hat lidarxistin. Piştî meşê welatiyan agir pêxistin û govend gerandin. Jinan gelek caran bê navber dirûşmên “Jin, Jiyan, Azadî” û “Newroz pîroz be” berz kirin.
Rêxistina Navçeya Sultanbeylî ya DEM Partiyê li Taxa Hemîdiye agirê Newrozê pêxist. Di pîrozbahiyê ciwanan eleqeyek mezin nîşan dan, dirûşmên “Newroz pîroz be” û “Bijî Serok Apo” berz kirin. Welatî demeke dirêj li dora agirê ku pêxistin govend gerandin.
Komîteya Amedakar a Newroza Şirnexê piştî qedexeyên derketina derve cara yekemîn di seatên evarê de ji bo pîrozbahiya Newrozê şahiyek li dar xist. Gel şahiya Newrozê li taxa Gemo ya navenda Şirnexê li dar xist. Hevberdevka DEM Partî Ayşegul Dogan, endamên DBP û DEM Partî ên Şirnexê û gelek kes tev li şahiyê bûn. Girseyê di pîrozbahiyê de fîşekên hewayî teqandin û li dora agir gerand gerandin.
Pîrozbahiyên Newrozê her şev li taxan berdewam dikin. Îşev jî agirê Newrozê li Taxa Şehîtlîkê ya Amedê geş bû. Beriya ku Newroza mezin a Amedê bê pîrozkirin, her roj û şev li taxan gel kom dibe û Newrozê pîroz dike. Şêniyên taxa Şêhîdlîkê li bircên Ben û Senê ya Amedê bi meşeleyan meşek girseyî li dar xist. Şêniyên taxê bi cil û bergên xwe yê Kurdî tev li pîrozbahiyê bûn. Gel dirûşmên “Bijî Serok Apo”, “Newroz pîroz be” û “Jin Jiyan Azadî” berz kirin. Di pîrozbahiyê de hevserokên Şarederaya Bajarê Nû ya Amedê Safiye Akdag, Mehmet Ergûn, rêveberên DEM Partî, DBPê ya Amedê, aktîvîstên TJAyê û gelek welatiyên tev li bûn.
Bi sedan kesên ku meşale xistin destê xwe û meşiyan tariya şevê ronî kirin û ruhê salên 1990î dan Newrozê. Gel li dora meşaleyan kom bûn û li ber dengê defê dirûşm berz kirin.
Girseyê piştî meşê agirê Newrozê pêxist û li ber agirê Newrozê govend geraend.
