Çalakiya greva birçîbûnê ya girtiyên siyasî yên li girtîgehên bakurê Kurdistanê û Tirkiyeyê tên ragirtin di çarçoveya kampanyaya “Ji Abdullah Ocalan re azadî, ji pirsgirêka kurd re çareserî” di 27’ê mijdarê de dane destpêkirin didome. Nobetên Edaletê yên malbatên girtiyan li derve dane destpêkirin jî 20 roj in didomin.
Stenbol
Çalakgerên Nobeta Edaletê ya li Stenbolê, dîsa pêşmalkên ku nivîsa “Tecrîd sûcê mirovahiyê ye” li ser dinivîsiye li xwe kirin û çalakiya xwe berdewam kirin. Li eywana avahiya Rêxistina DEM Partiyê ya Bagcilarê ku nobet lê didome bi kurdî û tirkî pankartên “Ji bo avakirina jiyaneke azad em tecrîdê rakin û ji zindanan re bibin deng” û “Ji bo edaletê em tecrîdê rakin, ji bo aştiya civakî em ji zindanan re bibin deng” cih girt. Endamên ANYAKAY-DER’ê û rêxistina DEM Partiyê ya Şîşliyê îro ji bi piştevaniyê serdana nobetê kirin. Xizma yek ji malbatên ku nobetê digire Cemîle Koçer, diyar kir ku divê gelê kurd zêdetir li girtiyan û Rêberê PKK’ê Abdullah Ocalan derkeve û got: “Em ê ji bo zarokên xwe û birêz Ocalan girtina nobeta xwe bidomînin. Heta ku daxwaza me ya edaletê neyê bi cih em ê li vir bin. Divê êdî hemû kurd rabin ser piyan.”
Wan
Nobeta Edaletê ya di pêşengtiya TUAY-DER a Wanê de li Rêxistina Partiya Herêmên Demokratîk (DBP) a Wanê hatiye destpêkirin berdewam kir. Rêxistina DEM Partiyê ya Artemêtê û rêveberên navend û navçeyan ên DBP’ê serdana çalakvanan kirin.
‘Emê gavan paşve navêjin
Endama Meclisa Dayikên Aştiyê Sîsê Şaybak a di serdanê de axivî wiha got: “Me li vir bi heman daxwazên girtiyan dest bi çalakiyê kir. Em bi daxwaza ku girtî û axa Kurdistanê azad bibe li vir in û heta hemû civak azad nebe em ê li vir bin.”
Rêveberê DEM Partiyê yê Artemêtê Kadîr Çîçek ê xizmê girtiyan e jî têkildarî çalakiyê wiha got: “Ev çalakî pîroz û bi nirx e. Dijmin çi bike bila bike, bi tankan, topan, balafiran êriş bike jî em ê bi paş ve gavê neavêjin. Em hemû qadên berxwedanê ji vir silav dikin. Em jî dê weke heval û zarokên me yên li girtîgehan li ber xwe didin heta dilopa xwîna xwe ya dawî li ber xwe bidin. Ne têkoşîna girtiyan ne jî girtî bi xwe bi tenê ne, heta ku girtî azad bibin em ê li ser şopa têkoşîna wan bin.”
Rêveberê DBP’ê Hazim Harmanci yê di serdanê de axivî, qala girîngiya çalakiya li girtîhan hatiye destpêkirin kir û wiha got: “Heke têkoşîneke xurt were dayîn dê tecrîda sîstematîk a li ser Rêberê PKK’ê Abdullah Ocalan hatiye kûrkirin bi dawî bibe. Dem dema ji tecrîdê re bibin bersiv e. Divê ev berxwedan tenê bi vir bisînor nemine, divê em berxwedana li girtîgehan veguhêzin kolan û taxan.”
Kesên tev li nobetê bûne her tim dirûşmeyên “Bijî berxwedana zindanan” û “Bijî Serok Apo” berz kirin.
Mêrsîn
Çalakiya Nobeta Edaletê ya Komeleya Piştevaniya bi Malbatên Girtî û Hikûmxwaran re ya Çûkûrovayê (Çûkûrova TUAY-DER) daye destpêkirin, di roja 20’emîn de berdewam kir. Di nobetê de her tim dirûşmeyên “Bijî berxwedana zindanan” û “Jin jiyan azadî” hatin berzkirin û klam hatin gotin.
Edene
Nobeta Edaletê ya li avahiya Komeleya Piştevanî û Alîkariyê ya bi Malbatên Girtî û Hikumxwaran re ya Edene Akdenîzê (AATUHAY-DER) di roja 20’emîn de berdewam kir. Pankartên “Tecrîd sûcê mirovahiyê ye” û “Ji bo edaletê em tecrîdê rakin, ji bo aştiya civakî em bibin dengê zindanan” hatin daliqandin. Çalakvanan di nobetê de armanca çalakiya xwe ji beşdarvanan re vegot.
