Bismîl de binê qereqolê rijîyayeyî ra esteyê merdiman vejîyayî. Esteyî zî ameyî teslîmê Mudirîya Park û Baxçeyan a Şaredarîye kerdene.
Qezaya Bismîlî ya Amedî de 2021 de xebata rijnayîşê qereqolêkî dîyabî destpêkerdene. Ame tesbîtkerdene ke wextê xebata kepçeyan de binê qereqolî de esteyê merdiman ameyê dîyene. Demo ke esteyî ameyî dîyene xebata rijnayîşî vinderte û warê esteyan pê betonî bi lezî ame qefilnayene.
Karkeranê xebate esteyî teslîmê Mudirîya Park û Baxçeyan a Şaredarîye kerdî la dima aqîbetê esteyan nêzanîya.
Goreyê zanayîşanê ke ameyî girewtene tayê kesan derheqê esteyan de qeyûmê Bismîlî Orhan Ayazî rê telefon kerd la Ayazî agahîye nêdaye çewî.
Şahîdêk/a ke nêwaşt nameyê xo eşkera bikero/a îfade kerd ke esteyî zerreyê yew kartonî de hetê Mudirîya Park û Baxçeyan a Şaredarîye ra teslîmê îmamê şaredarîye ameyê kerdene û îmamî zî bi nimitkî esteyî defin kerdê. Şahîdî/e da zanayene ke bi îxtîmalêkê pîlî nê esteyî aîdê ê kesanê ke 90an de cînayetanê faîlî-meçhulan de ameyê kiştene.
Bismîl de 1992 û 1994î de JÎTEM û Hîzbullahî xeylêk kesî kiştî û dima ke remnayî kerdî vînî. Goreyê dokumentanê ke Fermandarîya Cendirmeyan a Lîcê amade kerdê û serranê 2000an de vejîyê werte, Bismîl de xeylêk dewijî bi îdîaya ‘PKK de eleqeyê înan est o’ ameyê qeydkerdene û na lîste ra 13 kesî dima ameybî qetilkerdene yan zî vînîkerdene.
Fermandaranê Komandoyan ê Bismîlî ra Îzzet Curalo ke o çax cînayetê JÎTEM û Hîzbullahî serûber kerdêne, bi seyan kesî dayî barkerdene, dew û banê şarî vêşnayî.
Kesê ke mabênê serranê 1988 û 1994î de Bismîl de ameyê vînîkerdene nameyê tayînan wina yê: Abdulkadîr Kurt, Muhlîs Akbulut, Arap Guven, Îsmaîl Tunç, Ozeyîr Kurt, Musa Koluman, Şehmus Yuksel û Turgut Yenîsoy, Mahmut Çakmak, Şehmus Çelîk, Cahît Ozalp, Salhattîn Akbulut û Sadik Kortak.
Nînan ra têna gorê Îsmaîl Tunç û Arap Guvenî ameyî dîyene la aqîbetê 11 kesanê bînan nêzanîyeno.
