Seba pîrozîya rojê roşanê remezanî Qada Şex Seîdî de DEM Partîye, BDP û Hemşaredarê Şarederîyan roşanê şarê kurd pîroz kerd û vengda va: “Heme kes verba Amara ra bimeşîyo. Kesêke Ameyî bî Qada Şêx Seîdî înan ra Pawotox Bunyamîn Şeker, Hemşaredarê Sûrî Adnan Orhan û nuştox Adil Qazî seba rojbîyayene Rayberê Şarê Kurd Abdullah Ocalanî û 4ê Nîsane de verba Amara şîyayîşî ser rojnameyê marê qiseyî kerdî.
‘Şarê ma bawerîya xo bi dewlete nêyano’
Pawotox Bunyamîn Şekerî rojnameya ma rê wîna vat: “Ez verênî ra Roşanê Remezanê şarê kurd bimbarek keno û ez wazenê nê roşanê remezanî bibo wesîleyê aştî, birayeyî û azadî. Sebe ke, Birêz Ocalanî 27ê sibatî de vengdayîş da nê vendayîş heme hetîra gulbang da, la hemazî hikûmatê AKP û MHP’yî yew game nêeşta. Reyna zî hêvîya şarê ma nê pêvajoyî ra esta. Şarê ma bawerîya xo bi dewlete nêyano. Tena bawerîya Rayberê xo keno. 1ê nîsanî de seba meşayîşê amara Qada Şêx Sedî de şar û heme komelê rêxistinî bi rayberîya ciwanan de kom benê heyana plazaya AZC. Ma veng danê şarê ma 4ê nîsane de verba Amara bimeşîyo û peyamê rayberê xora vayîr bivejîyo.”
‘Roşanê remezanî bibo wesîleyê aştî û azadî’
Hemşaredarê Sûrî Adnan Orhanî zî rojnameya ma rê qesî kerd û vat: Ma Qada Şêx Seîdî de roşanê şarê kurd bimbarek kenê û ma wazenê ke nê roşanê remezanî bibo wesîleyî aştî û azadî. Vengdayîşê Rayberê Şarê Kurdî ra heme kes wayîr vejîya û eynî wayîrvejîyayîş zî 21ê Adare de Newroz de eşkera kerd. La ganî dewlete game bierzo, bi tena vatiş nêbeno. Her çiqas Serokkomar Erdogan vano ma game eşta, la raştîyede çîyê nêaseno. No sebeb ra şar bawerî nêkeno. Ganî gama şênber bierzo û şar bawer biker o. Senîhewa şarê kurd vengdayîşê Rayverê xora wayîr vejîya û ganî rihê newroze ra bimeşê verba Amara şêrê û rojbîyîşê azadîya Rayberê xo pîroz bikerê. Ma heme şarê xo dawet kenê bêrê 4ê nîsane de ma verba Amara şime û rojbîyayena Rayberê Şarê Kurd Abdullah Ocalanî pîroz bikim.”
‘Şarê kurd azadî û aştî wazeno’
Nuştox Adîl Qazî zî roşanê şarê kurd bimbarek kerd û waşt ke roşanê remezanî bibo sebebê aştî û azadîye. Adîl Qazî wîna dewam kerd: “Seba ke, Birêz Ocalanî 27ê sibatî de vengdayîş da û nê vendayîşî ra heme çar perçeyanê kurdistanî zî wayîr vejîyayî. Şarê kurd 21ê Adarî de destanî nuştî, seba azadîya Rayber Apoyî morê xo da piro. Ez bawera ancî zî bi rihê newrozî ra 4ê nîsane de verba Amara seba rojbîyayena Rayberê xo rayera şinê û pîroz kenê.”
