Li Bakur û Rojhilatê Sûriyeyê çalakiyên ji bo azadiya fizikî ya Rêberê PKK’ê Abdullah Ocalan bi hezaran kes daketin qadan û bi girseyî meşiyan.
Heleb
Bi sedan şêniyên taxên Şêxmeqsûd û Eşrefiyê yên Helebê bi meşekê xwest agahiyê ji rêber Abdullah Ocalan bigirin. Însiyatîfa Sûriyeyê ya Azadiya Rêber Abdullah Ocalan meş organize kirin. Di meşe de endamên saziyên sivîl, partiyên siyasî, jin û ciwan jî beşdar bûn.
Meş ji pêşiya hola civînan a 8′ê Adarê ya li taxa Şêxmeqsûdê dest pê kir. Di meşê de wêneyên Rêberê PKK’ê Abdullah Ocalan û pankartên “Dem dema azadiyê ye”, “Ji Abdullah Ocalan re azadî, ji pirsgirêka Kurd re çareseriya siyasî” hatin vekirin. Bê navber dirûşmên “Bê Serok jiyan nabe” û “Bijî berxwedana Rêber Apo” hatin berzkirin. Meş li qada 7 Şehîdan a li beşê rojhilat ê taxa Şêxmeqsûdê veguherî mîtîngê. Li vir berdevka Însiyatîfa Sûriyeyê ya Azadiya Rêber Abdullah Ocalan a Helebê Amine Xidro daxuyanî xwend û daxwaza naskirina azadiya fizîkî ya Abdullah Ocalan anî ziman.
Reqa
Li bajarê Reqayê jî bi beşdarbûna bi sedan kesî meşek hat lidarxistin. Meş ji ber avahiya Meclisa Giştî ya Reqayê dest pê kir û li çerxerêya Neîm bi dawî bû. Beşdaran dirûşmên “Bê Serok jiyan nabe”, “Hilweşe komploya navneteweyî” û “Bi can bi xwîn em bi te re ne Ocalan” berz kirin.
Li çerxerêya Neîm endama Meclisa Malbatên Şehîdan a Reqayê Ebîr El Xelîl axivî. Ebîr behsa binpêkirinên qanûnên mafên mirovan û girtiyan ji aliyê dewleta tirk ve kir û got: “Kiryarên li dijî Rêber Abdullah Ocalan li dijî qanûnên nanveteweyî yên mafên mirovan e.”
Ebîr destnîşan kir ku têkoşîna Abdullah Ocalan a ji bo jinan, bi taybet jinên ereb ji pirsgirêkên civakê yên ji ber zihniyeta baviksalar a hegemonîk derketine re çareserî ne.
Ebîr El Xalîl bi navê jinên Reqayê bang li civata navneteweyî û rêxistinên mafên mirovan kir ku zextê li desthilata tirk bike bila rewşa Rêber Abdullah Ocalan aşkera bike û wiha got: “Hêzên navneteweyî berpirsên rewşa girtiyan e.”
Endamê Komîteya Kar û Barên Olî Şêx Yehya Ebû Beraa anî ziman ku desthilata tirk bi girankirina tecrîdê dixwaze Rêber Abdullah Ocalan ji derve qut bike. Çalakî bi dirûşmên ji Rêber Abdullah Ocalan re azadî bi dawî bû.
Hesekê
Bi heman armancê bi sedan şêniyên bajarê Hesekê meşek li dar xist. Girse ji çfrxerêya Sînalko meşiyan çarxerêya Kevokê. Beşdaran wêneyên Rêber PKK’ê Abdullah Ocalan û pankartên “Sonda me em ê pergala Îmraliyê hilweşînin û bi Rêberê xwe re azad bijîn” vekirin. Li çarxerêya Kevokê endamê Meclisa Giştî ya PYD′ê Ebdulxenî Oso armanca lidarxistina vê meşê diyar kir û got, hêzên nanveteweyî û NY′yê berpirsên rewşa Rêber Abdullah Ocalan ne. Çalakî bi dirûşmên “Bê Serok jiyan nabe” bi dawî bû.
Til Birak
Li navçeya Til Birakê ya kantona Hesekê bi sedan kesî ji bo naskirina azadiya fizîkî ya Abdullah Ocalan li kolanên navçeyê meşiyan. Di meşê de dirûşma “Bê Serok jiyan nabe” berz kirin. Meş li ber navenda Hêzên Ewlekariya Hundirîn rawestiya. Li vir jî hevseroka Meclisa Malbatên Şehîdan a Til Birakê Weed El Ilêwî daxuyanî xwend. Di daxuyaniyê de ji bo pêkanîna azadiya fîzîkî ya Rêber Abdullah Ocalan banga xurtkirina têkoşînê hat kirin. Çalakî bi berzkirina dirûşma “Bê Serok jiyan nabe” bi dawî bû.
Li navçeya Şedadê ya kantona Hesekê jî bi sedan kes ji pêşiya navenda Tevgera Ciwanên Şoreşger a Sûriyeyê ber bi Parka Rêbertî ve meşiyan. Li ber parkê endamê Yekitiya Jinên Ciwan Îqbal El Ebdo axivî, tecrîda li ser Rêber Abdullah Ocalan şermezar kir û got, desthilata Tirk bi tecrîdê dixwaze Rêbertî ji gel dûr bixe. Ji rêveberên PYD′ê Fadil El Ehmed jî bang li desthilata Tirk kir ku dimildest rewşa tenduristî ya Rêber Abdullah Ocalan aşkera bike.
Her wiha endamê Federasyona Gaziyên Şer Ehmed El Elî anî ziman ku ew daketina qadan da ku rewşa Rêber Abdullah Ocalan nas bikin û got: “Rêber Abdullah Ocalan hewl dide neteweya demokratîk û jiyana hevbeş û edaletê pêk bîne. Em deyndarên Rêbertî ne, mafê me heye rewşa wî ya tenduristiyê nas bikin.”
Çalakî bi berzkirina silavkirina berxwedana Rêber Abdullah Ocalan bi dawî bû.
