Bi hezaran jinên Kantona Firatê 8’ê Adarê Roja Jinan a Cîhanê bi dirûşma “Bi vîna jinên azad em ê polîtîkayên qirkirin, dagirkerî û tecrîdê têk bibin” pîroz kirin. Jin di saetên sibehê de herikîn qada pîrozbahiyê û şahî li dar xistin. Jinan di pîrozbahiyê de li nirxandinên Rêber Gelê Kurd Abdullah Ocalan ên der barê jinan û rola wan a dîrokî de guhdarîkirin. Piştre berdevka Koordînasyona Kongra Star a kantona Firatê Zozan Bekir diyar kir ku bi saya keda salan a şehîdan ew 8’ê Adarê pîroz dikin û bi vê boneyê şehîdên azadiyê bi bîr anîn.

Zozan Bekir diyar kir ku bi pêşengiya Tevgera Rizgariya Kurdistanê jinan gavên dîrokî ber bi mîsogeriya azadiya xwe ve avêtin û wiha pê de çû: “Nabe em di nîvê rê de bisekinin, pêwîstiya cîhanê bi vê yekê heye ku şoreşa jinan a li herêma me veguhere şoreşeke gerdûnî li hemberî hêzên paşverû yên ku ji hezarên salan ve şerê hebûna jinan dikin, têkoşînê xurt bikin. Em ê bixebitin heta ku tevahî jinên cîhanê vê rojê pîroz bikin. Bê guman naskirina girîngiya vê rojê bi xwendina ramanên Rêber Abdullah Ocalan û têkoşîna wî ya ji bo azadiya jinan û civakan dibe.”

Rêvebera Meclisa Jinan a Meclisa Malbatên Şehîdan a Kantona Firatê Eyşe Efendî jî anî ziman ku ew ê xeta azadiyê ya jinan temam bikin û got: “Ruxmî êşên mezin em di wê baweriyê de ku dê jin rola xwe ya dîrokî vegerînin. Ji bo ku ev yek pêk were jî divê di hemû qadan de; leşkerî, siyasî, dîplomasî, civakî û hwd fedakariyên mezin werin dayîn. Em li vir in da ku bidin xuyakirin ku em amade ne di vê rêyê de bimeşin.”

Piştî axaftinan, ji aliyê komên çand û hunerî yên Peymangeha Vajîn, Tevgera Hîlala Zêrîn a Çanda Jinan û Navenda Çand û Hunerê ya Baqî Xido û komên din ve stran strin, şano pêşandan û govend gerandin.