Tarîx ra heta ney demî kurdî çiqas şidîyayî û bîyî warê tecrûbeyan, enerjîyê înan zey ûranyûmî zêdîyayo û ver bi kesanê ke dijminateya kurdan kerdê de zey koyêko asê û heybet ters dayê mezgê dijminan  

Kurdî bi se serrano ke Osmanîyan ra, bi hezar serrano zî verî Osmanîyan xoverdayîşê merdiş û cuyayîşî danê.  Se serrîyo ke zî bi zilmê tirkan, farisan û ereban reyde xoverdayîş kenê. Ewropa û DYA (Dewletê Yewbîyayeyî yê Amerîka) kurdî xora zey bazarêko bêlojin vînayê û bi dijminîya kurdan reyde kurdan ser o bezîrganîya xo kerde û kenê.

Kurdan her xoverdayîş de bi can û malê xo zirar kerdê û zirar dayê dijminan. Rîyê erdî yê dinya de çi netewe çîn a ke hintayê kurdan zilm û zordarîye bivîno. Kurdî her çiqas veyşan û teyşan mendê û rastê qirkerdiş û merdişan amebî zî nêqedîyayî. Zey nimûne kurdî zey qimilo ke xileyî wenê nêqedîyayî û nêqedîyenê.

Tarîx ra heta ney demî kurdî çiqas şidîyayî û bîyî warê tecrûbeyan, enerjîyê înan zey ûranyûmî zêdîyayo û ver bi kesanê ke dijminateya kurdan kerdê de zey koyêko asê û heybet ters dayê mezgê dijminan. Ne dijminan dijminateya xo ra fek verada, ne zî kurdan xoverdayîşê xo ra qelsîye kerde.

Nê rojê ke ma tira ravêrenê de zî, kurdî semedo ke aştî û aramî bidê xo û dormeyê xo, bi heme kiştan ra cigeyrayîş û xoverdayîşan de yê. Kiştê ra azadîya rayberê xo Abdullah Ocalanî û giroteyanê zîndanan, kiştê ra zî semedo ke Tirkîya waştişê kurdan bi qanûn bido cigeyrayîşan mîyan de yê.

Hinî eyseno ke lingeyêka TC’yî şer de, linga bîne zî zey waştişê aştî eyseno de menda. Hewna nêzana ke çi çî bikero. Çimkî se serrî yo ke bê polîtîkaya şer û qirkerdişî polîtîkaya weşî û geşî awan nêkerda. Heme emberîyanê xo de dijminateyî qise kerdo û domanê ke Tirkîya de cuyenê zî cîranê sînorê xo zey dijmino xozayî dayo şinasyayîş. Ongo rewşa fekciraveradayîşî do zaf zehmet û bi dejan bibo eyseno. No tablo, eke Tirkîya biwazo aştî û aramî bêro yo. Kişta bîne de eke senaryo wina nêbo, şer pêrodayîş verî ra xedar û xirabin do ravêro. Çimkî dewletê bîyanijî rayêko bîn do bezîrganîya bêlojine dekerê rojeve û kurdan ser o bi hawayêko takas ango rotişê malê xo bikerê. No zî polîtîkaya bîyanijan a.

Belê lazimo ke kurdî nê rojan zaf zaf haydarê xo bibê ke Kurdîstanî yew perçe awan bikerê. Lazimo ke çahar perçeyê kurdan yew xelekî dorme de kom bibê ke tarîx de çongê ci meyêrê erdî û nêdejê.

Aştî karêko zehmet o. Aştî cinawirêkê şerî ra veşî bi jahr a. Biratîya bi heq û edalet qanika fekê sîyasetmedaran ra nêkûro ke Konfederalîzmê Kurdîstanî awan bibo.