Parlementerê HDPyî yê Colemêrgî Saît Dedeyî pare kerd ke şarê Colemêrgî nêeşkeno beranê sînorî ra îstîfade bikero û îfade kerd ke berê sînorî têna pêşkêşê terefgîranê AKPyî yenê kerdene.

Colemêrg rixmo ke serê sînorê Rojhelat û Başûrê Kurdîstanî de yo polîtîkaya dewlete ya xizankerdişî, koçberî, qedexe û teda ra mîyanê xizanîye û bêkarîye de yo. Berê sînorî yê Bajêrganî sînorê Rojhelatê Kurdîstanî de yo, berê sînorî yê Uzumluyî zî sînorê Başûrê Kurdîstanî de yo.

Şarê Colemêrgî wazeno nê wird berê sînorî bêrê aktîfkerdene. AKP wird beran zî vera şarê herême sey hacetê weçînayîşî xebitneno.

Parlementerê Partîya Demokratîke ya Şaran (HDP) yê Colemêrgî Saît Dedeyî derheqê babete de ANFyî rê qisey kerd. Dedeyî ard ziwan ke berê sînorî çimeyê debare yê pîlî yê herêm ê û vat: ”Têna tay fîrmayî eşkenê Berê Sînorî yê Bajêrganî ser ra bazirganîye bikerê. Heyf ke şarê Colemêrgî nêeşkeno nê berî ra îstîfade bikero. Berê Rûbarokî rixmê vateyê ‘abîyo’ hema zî faal nîyo. Weçînayîş de hende sozî dîyayî la ber anêbi.

Berê Sînorî yê Uzumluyî serra 2015î ra nata akerde yo la tede bazirganîye nêna kerdene. Têna destûrê şîyayîş-ameyîşî dîyeno. Kotayê beranê sînorî pêşkêşê terefgîranê îqtîdarî yenê kerdene. Kapasîteya bazirganîya sînorî qestî ra hetê dewlete ra yena qelskerdene. Sînoro ke mabênê kurdan de virazîyayo, bi serran o bîyo sebebê mergê kolberan û astengkerdişê heqê bazirganîya şarê herême.” COLEMÊRG