Pêngava “Ji Abdullah Ocalan re azadî ji pirsgirêka kurd re çareseriya siyasî’’ ji 10’ê cotmehê ve dewam dike. Di qonaxa ewil de ev pêngav dengek mezin veda. Vêca encamên vê yekê îsal di şahiyên cejna Berxwedanê, di Newrozê de hatin dîtin. Qadên Newrozê dîtbariya peyama ‘’Newroza Azadiyê’’ bûn. Bi milyonan mirovan ji Rojhilat bigire heta Bakur û çar aliyên Kurdistanê, dîsa li derveyê welat daketin meydanan. Newroza sala 2024’an bi daxwaza azadiya Rêber Ocalan hat pêşwazîkirin û bi mizgîniya xistina 15 balafirên dewleta tirk a dagirker bi coş bû. Wekî din Operasyona Şehîd Ciwan û Şehîd Andok a Newrozê ku derbek mezin li dagirkeran xist mohra xwe li roja Newrozê xist. Bêguman dîmenên ku ji Amedê derketin beyî nîqaşin, lê weke din jî coş û kelecana Newrozê îsal tevî hemû êrîş û hedefgirtinan jî pir bi girseyî hat pîrozkirin. Peyama Gerîlayên Azadiya Kurdistanê, gerîlayên YJA Starê ji bo pêngava Azadiya Rêber Ocalan ev bû ‘’Ev pêngav nîşan dide ku paradîgmaya Rêber Apo gerdûnî bûye.’’ Tevgera ciwanan jî bi çalakiyên cur be cur ên weke xistina dronên sembolîk tev li coşa Newrozê bûn û diyar kirin ku wê bi Newrozê re çalakiyên ji bo Azadiya Rêber Ocalan bidawî nebin, berovajiya wê dê xurtir û bi bandortir bin.
Li Ewropayê ji Rêber Ocalan re qert hatin şandin. Çalakî ser çalakî. enerjiyek hevpar a çalakiyan derket holê. Ev enerjiya hevpar ku di çalakiyan de derket holê pir balkêş e. Weke lehiyek çêbû, me beriya niha behsa şîroveya Rêber Ocalan ya hejandina baskên perperikê kiribû. Li gorî vê; Ger li Hindistanê perperîkek, baskên xwe dihejîne wê pelên wê bandorê li Kurdistanê bike. Qadên Newrozê ên îsalê tabloya vê hejandinê ne.
Ev hejandin ne tenê ya hestên me ye. Dijminên mirovahiyê, dijminên fikrê azadiya Rêber Ocalan jî bi hatina Newrozê hejiyan. Weke hercarî pêlên girtin û binçavkirinên li Bakur, êrîşa nijadperestiyê ya li Belçikayê, gefên êrîşan, hevdîtinên siyasî ên li dijî gelên Kurdistanê tên kirin. Dijminê kurd û Kurdistanê heybeta cejna me hazim nekir. Tevî vê jî hewl dan bi awayek bêbingeh Newrozê bikin ‘Nevroz’ û bi îdiayên ku cejna Newrozê ya tirkan e nîşan bidin. Vê yekê bi rêya wezaretxaneyên xwe xistin rojeva milet. Dema mirov van nûçeyan dibîne, zarokek ku ji ber lîstika zarokên din hesûdiyê dike tê bîra mirovan. Lê ya dewleta tirk ji vê hinekî kûrtir e, hewldana bêmanekirina her tişta me di serî de çanda me ye. Ev yek pir bi hesanî tê dîtin, lê bi rastî jî ên ku bi van çîrokan dixapin jî hene.
Niha di roja me ya îro de kesek ku ji xwe re dibêje ez mirovim, gelo dikare hincetek bi wate ji bo êrîşa ser malbata kurd ya ji Rojava ya li Belçîkayê bibîne? Malbatek ku ji şahiya Newrozê vedigere malê û di şexsê vê malbatê de bi destê nijadperestên li Belçîkayê êrîşek siyasî tê kirin, êrîşek plankirî. Ev ne êrîşek ji rêzê bû û divê weke nehazimkirina heybeta Newrozê were dîtin, di heman demê de weke hêrsa li beramberî serkeftinên tevgera azadiyê. Lê dijminê mirovahiyê kengî binkeftinekê xwe hazim kir, ne wisa?
Di encamê de em dikarin bêjin pêngava ‘’Ji Abdullah Ocalan re azadî ji pirsgirêka kurd re çareseriya siyasî” mohra xwe li pêvajoyê dixe, her ku diçe mezintir û bi bandortir dibe. Ji 7 heta 70’ê salî dengê xwe ji bo azadiya Rêberê xwe bilind dikin. Ber bi hilbijartinên li bakurê Kurdistanê helwestek hevpar derket û ya herî girîng ev e ku em vê ruhê Newrozê bikin ruhê pêngava azadiyê.
4’ê Nîsanê li ber deriyê ye, roja vejînê ruhê têkoşînê zindî dihêle. Gelên bindest ên ku Rêber Ocalan weke Rêberê xwe qebûl kirin bêrawestan di nav tevgerê de ne û lehiya ku bi hatina Newrozê rabû hemû astengiyên li ber xwe tîne dike. Ev êrîşên ku tên kirin jî îşareta wê ne, dijminê me bi avjeniyê nizane. Eger ev lehiya têkoşînê ya Newrozê bigihe heta 4’ê Nîsanê, diyar e wê êrîşên dewleta tirk a dagirker û komplogeran têr nekin ji bo xwe veşêrin.
Roja ku Rêber Ocalan hat dinê, avabûnek nû ya jiyanek nû bû. Armanca ber bi rojbûna 75’an ya Rêber Ocalan jî nûbûnek di şerê cîhanê de ye. Ev 25 sal in bi dîlgirtina Rêber Apo re dixwazin guhertinên ji bo azadiyê, ji bo demokrasiyê asteng bikin. Lê nûbûn di roja ku Rêber Ocalan çêbû de hat, di avakirina Partiya Karkerên Kurdistanê (PKK) de hat, Di artêşbûnê de hat, di rêxistin û artêşbûna jin de hat, di guhertina paradîgmayê de hat, hat û hat. Diyalektîka jiyanê bi herikbariya wê tê nasîn, herikbarî nûbûnan bixwe re tîne. Yên ku vê nûbûnê dixwazin bisekinînin wê li beramberî enerjiya gerdûnê nikaribin bisekinin.
Di dema xatirxwestinê de em tenê carek ji ya heyî re çavê xwe bigirin û xeyal bikin Rêber Ocalan di nav xwe de bibînin û deriyên cîhanê li nûbûnên herî mezin vekin. Bila ev bibe hinceta me ya mezinkirina têkoşînê. 4’ê Nîsanê, roja vejînê li tevahî mirovên azadîxwaz pîroz be!!
