Hevserokê Konseya Rêveber a KCK’ê Cemîl Bayik beşdarî bernameya taybet a Stêrk TV bû û li ser êrişên dagirkeriyê, konsepta qirkirinê ya li gelê turd tê ferzkirin, êrişên li ser Şengalê û kampanya ji bo azadiya Rêberê PKK’ê Abdullah Ocalan axivî. Bayik, anî ziman ku 1’ê Gulanê li tevahiya cîhanê tê pîrzokirin û wiha got: “Cejna karker û kedkaran e. PKK di asta herî bilind de vî ruhî û vê kevneşopiyê temsîl dike. Ji ber ku 1’ê Gulanê rabûna li ber zilm, bêedaletî û desthilatdariyê ye. PKK ji bo vê têdikoşe. Her kes dibîne ku îro ev ruh li Zap û Avaşînê di berxwedanê de tê nîşandan. Ji xwe gelê Kurd jî civakeke karker û kedkar e, ne tenê li Kurdistanê li tevahiya cîhanê belav bûye û civakeke karker e.
Bayik bal kişand ser şerê li herêmê û wiha got: “Demeke dirêj e konseptek li tevgera me û gelê me tê ferzkirin. Dixwazin vê konseptê niha li Başûr (Başûrê Kurdistanê) bigihînin armanca xwe. Armanc ji vê konseptê ew ku PKK’ê çawa bêbandor bikin. Li rêbaza qirkirinê li gelê kurd ferz dikin çawa bibin serî? Digerin. Konsept li ser vî esasî tê meşandin. Li gorî vê konseptê jî li Zap û Avaşînê dest bi êrişeke nû kirin. Ev êriş ne tenê li ser tevgera me ye, di heman demê de li dijî gelê kurd û tevahiya mirovahiyê ye. Di vir de rolek dane dewleta tirk û PDK’ê û ew jî mîsyona xwe bi cih tînin. NATO ji her alî ve piştgiriyê dide vê konseptê. DYE, Îngilistan û Almanya di nava vê konseptê de ne. Hewl didin astengiyên ku PKK datîne pêşiya modernîteya kapîtalîst ji holê rakin û qirkirina li gelê kurd tê ferzkirin bi encam bikin. Baş zanin ku heta Rêber Apo, PKK’ê û gerîlayên PKK’ê bêbandor nekin wê nikaribin vê qirkirina li gelê kurd tê ferzkirin bibin serî. Lewma hedefa wan a sereke PKK ye.”
‘Dixwazin siyaseta Osmanî serwer bikin’
Bayik, da zanîn ku hedefa hêzên navdewletî ne tenê PKK û gelê kurd e û ev agahî dan: “Di hedefa wan de Rojhilata Navîn jî heye. Ew bi xwe jî vê dibêjin; li Rojhilata Navîn dixwazin siyaseta Osmanî serwer bikin. Bi konsepta li Bakur, Başûr û Rojava dimeşînin re dixwazin Rojhilata Navîn bixin bin hegemonya xwe. Di şexsê gelê kurd û Rojhialta Navîn de mirovahî jî bi metirsiyeke mezin re rû bi rû ye.”
Hevserokê Konseya Rêveber a KCK’ê Cemîl Bayik, destnîşan kir ku wezîfeya konsepta nû dane dewleta tirk û PDK’ê û wiha berdewam kir: “Dewleta tirk û PDK vê planê ji bo wan dimeşînin. Di vê planê de berjewendiyên modernîteya kapîtalîst hene. Yên ku vê sîstema êrişê dimeşînin; lewma deng nakin. Eger vana konseptek li gelê me û tevgera me ferz nekiribûna, eger wezîfeyek nedabûna Tirkiye û PDK’ê, nepêkan bû ku Tirkiye û PDK li dijî tevgera me-gelê me vî şerî bimeşanda. Li pişt vê DYE, Îngilistan, Îsraîl û Elmanya hene. NATO ji her alî ve piştgiriyê dide Tirkiyeyê û PDK’ê. Eşkere ye ku Tirkiye û PDK jî bi vê piştgiriyê şer dimeşînin. Li Kurdistanê komkujî heye, êşkence, koçberkirin, asîmîlasyon û guhertina demografiyê heye, xweza tê talankirin, bi kurtasî ji bo gelê kurd nikaribe lê bijî çi ji destê wan tê dikin.”
‘Kurdistan dilê Rojhilata Navîn e’
Bayik, anî ziman ku siyaseta modernîteya kapîtalîst ku li dijî Rêberê PKK’ê Abdullah Ocalan û PKK’ê dimeşîne, ne tenê bi PKK û Bakur (Bakurê Kurdistanê) bi sînor e û wiha axivî: “Ne tenê bi kurdan re bi sînor e. Siyaseta ku tê meşandin ew siyaset e ku li Rojhilata Navîn tê ferzkirin. Ji bo meşandina vê siyasetê beriya her tiştî divê li hemberî Rêber Apo û PKK’ê encamê bi dest bixin. Ji ber ku Kurdistan dilê Rojhilata Navîn e. Yên dixwazin li Rojhilata Navîn encamê bi dest bixin, divê destpêkê li Kurdistanê encamê bi dest bixin.”
Bayik li ser siyaseta Iraqê ya li diijî êzidiyan jî rawestiya û wiha got: “Iraqê digot, ‘Ez dostê gelan, dostê olan im’. Ji êzidiyan bêhtir gelekî mezlûm nîne. Kêm mane û li gorî baweriya xwe dixwazin bijîn. Divê Iraq baş zanibe ku ev siyaseta dimeşîne wê qet bi kêrî wan neyê, ji êzidiyan bêhtir wê zerarê bide wan. Em vê siyasetê şaş dibînin. Li cîhanê jî hêzên demokrasî û azadiyê divê xwedî li êzidiyan derkevin. Ji ber ku êzidî dixwazin bi rengekî azad bijîn. Civaka êzidî bi şerê dijî DAIŞ’ê re xizmet ji mirovahiyê re kir. Lewma divê mirovahî li ber vê siyaseta li dijî êzidiyan rabe, Banga me ya li cîhanê û mirovahiyê bi vî rengî ye.”
‘Li ser kurdan siyaseta qirkirinê dimeşînin’
Cemîl Bayik li ser siyaseta Tirkiyeyê ya ku li ser gelê kurd dide meşandin jî rawestiya û wiha pêde çû: “Siyaseta dewleta tirk li ser kurdan dide meşandin, siyaseta qirkirinê ye. Li ser navê kurd û Kurdistanê çi hebe dixwaze ji holê rake. Vê siyasetê herî zêde li zindanan tê pêkanîn. Ji ber ku siyaseta qirkirinê herî zêde li wir esas tê girtin. Yên li ber siyaseta qirkirinê radiwestin, yên li ber wê têkoşînê dikin, davêjin zindanê. Ev siyaset hê zêdetir li zindanan diyar dibe û tê pêkanîn. Eger ku mirovek bizane dewleta tirk siyaseteke çawa li ser gelê kurd dimeşîne, divê li zindanan binêre. Siyaseta îro li zindanan tê kirin, siyaseta qirkirinê ye. Dixwazin vînê bişkîne, teslîm bigire, bixin bin xizmeta xwe. Ji ber ku dixwazin gelê kurd û kurdistanê ji holê rakin. “
Bayik, herî dawî bal kişand ser têkoşînag elê kurd û wiha bi dawî kir: “Dewleta tirk û hevkarê wê PDK, NATO, Amerîka, Îngîltere, Almanya, Îsraîl… ên li pişt vê, divê ev bizanin ku çi dikin bila bikin, wê nikaribin vîna PKK’ê, gerîla, hevrêyên li zindanan û gelê kurd bişkînin. Her ku ew bixwazin bişkînin, wê hêrsa gelê kurd hê bêhtir mezin bibe, wê hêrsa PKK’ê xurtir bibe, wê ev yek wana bişkîne. Ên dawiya dawî winda bikin wê ew bin. Gelê kurd wê mezin serbikeve. Wê ev yek mezin bi herkesê jî bide qezenckirin.”
