Başûrê Kurdistanî êdî de facto kewto binê serdestîya dewleta tirke. Yeno vatene ke artêşa tirke Başûr de wayîrê 80 bargehan a. Êdî tayê cayan de kontrolê rayîr û nasnameyan zî kena. Nameyê nê “kolonî” yo. PDK û keyeyê Berzanîyan êdî herême teslîmê tirkanê kolonyalîstan kerde. Têna teslîmkerdiş çin o. Nê rojan pîya amadekarîya şerî zî kenê. Duhok, Amêdiyê û Metîna de tank, wesayîtê bizirxî û çekê tirkan bi destûrê PDKyî hêrişan kenê. Keyeyê Berzanîyan de “sendromê Stockholmî” est o. Êyê ke kurdan qir kenê, kultur û nasnameyê kurdan asîmîle kenê, ziwanê kurdan qedexe kenê, şaristananê kurdan îşxal kenê rê “verardîya” xo akeno. Merdim yan îdareyo welatperest qetî nîya nêeşkeno têbigêro. Keso ke wayîrê hîsê welatperestî yo, ganî berê Kurdistanî “îşxalkeran” rê biqefilno. Na polîtîkaya dîplomasî nîya. Tayê nuştoxî û sîyasetmedarî vanê ke PDK “dîplomasî” keno. Vileçewtkerdiş û nehîsgêrîye polîtîka nîya. Her leteyê Kurdistanî her roje yeno bombardumankerdene, şima qet eleqedar nêbenê û înanê ke bombayan şuxilnenê rê “xelatan” vila kenê. No senîn dîplomasî yo? Êdî tu kurdêk xo nêxapêno, PDK rolê Rayber, Bînbaşi Kasim, Harpagos, Haci Mûsayê Motkanijî kay keno. PDK êdî ruhê xo teslîmê “qetilkaran” kerdo, înan rê “bendeyîye” keno. Eke her welatperestêk Başûr de weşhalîye wazeno, ganî vera PDKyî lej bikero. Sewbîna Başûr demê nêzdî de “tirk” beno.
Nê rojan wendoxî zî taqîp kenê, cergê DAÎŞî bi destê artêşa tirke û PDKyî yenê amadekerdene. Ê do Amêdiyê û Metîna de vera gerîlayan şer bikerê. Ame eşkerakerdene ke 800 cergî herême de ca bîyî. Nê cergan Efrîn de dewleta tirkan ra perwerde girewtbî. Na rewşe mojnena ke mîyanê DAÎŞ, PDK û dewleta tirke de têkilîyê lêşinî est ê. Xora merdim zano ke naye ra 10 serrî verî Şingal bi destê DAÎŞî amebî îşxalkerdene. Bi hezaran kesî amebî qetilkerdene, cinîyî û domanî sey kole roşîyabî. PDKyî o dem zî tedbîrî nêgirewtî û çimanê êzidîyan de “guman” aferna.
Meşrûîyetê cergan
Keyeyê Berzanîyan êdî zano ke Başûr de “meşrûîyetê” ci çin o û her ke şino mîyanê şarî de “prestîjê” xo vîndî keno. Endamê nê keyeyî (Mesûd Berzanî, Neçîrvan Berzanî, Mesrûr Barzanî ûsn.) êdî zanê ke “sucdar” î. Coka hewcedarê şerî yê. Bi polîtîkaya şerî Başûr de rojdem bedilnenê. Ê zanê ke şaro kurd êdî bêrayîrîye, bertîl û bêedaletîye înan ra bêzar bîyo. Coka Berzanîyî wazenê vîrê şarî bibedilnê. No metod Erdoganî ra derbasê înan bîyo. Senî ke Erdogan seba ke nêro muhakemekerdene polîtîkaya şerî ano ca, keyeyê Berzanîyan zî polîtîkaya winayêne ano ca. Ne emrê Erdoganî ne zî emrê PDKyî derg o. Îdareyo ke hewcedarê şerî yo, peynîye de estbîyayîşê xo vîndî keno. Çike no îdare êdî şarî ra hetkarîye nêgêno. Çîyo ke îradeyê şarî nêşinasneno, netîce de wedarîno. “Îtîfaqê cergan” do qetî vîndî bikero.
