Hetkara Hemserekanê HDPyî Başarane ard ziwan ke AKP semedê menfeatê rejîmê xo nêwazeno meseleya kurdî bêro çareserkerdene û vat: ”Hinî pê nê îqtîdarî na mesele çareser nêbena.”
Hetkara Hemserekanê HDPyî Ayşe Acar Başarane qisey kerd û tecrîdê vera Rayberê Şarê Kurdî Abdullah Ocalanî sey dewamê komployê mîyanneteweyî hesibna û vat: Senî ke prosesê teslîmbîyayîşî têna hetê dewleta tirke ra nêame rayraberdene, tecrîdê ewroyî zî pîya bi hêzanê mîyanneteweyî yeno domnayene.
Başarane vat: ”Ez nêwazenê zaf hetê huqûqî ra qala mesele bikerî, çunke hetê huqûqî ra qet îzahêkê ci çîn o. Yewna rejîm yeno caardene ke mîyanê ci de mekanîzmayê mîyanneteweyî zî estê. Coka hetê polîtîkî yê babete giranêr o. Gama ke ma ewnîyenê prosesê ke Abdullah Ocalan Sûrîye ra vejîya ra, ma vînenê ke hêzanê emperyalîstan Rojhilatê Mîyanênî de senî yew sîyaset reyra berdêne. Înan waşt ke verê modelê neweyî û perspektîfê ci yo ke ewro Rojawan de vejîyayo werte, bigerê û kurdan bîyarê vera yewbînan. Ewro polîtîkayê astengkerdişê yewîye yê kurdanê Başûrî eserê ajandaya ê rojan o.”
Başarane bale ante polîtîkaya hêrişkare ya AKPyî ya vera kurdan ser û vat: ”AKPyî meseleya kurdî sey ‘teror’î name kerd û polîtîkayê şerî afernayî. Îqtîdarî semedê menfeatanê xo meseleya kurdî bêçare verdaye. AKP seba ke rejîmê xo bikero mende meseleya kurdî bêçare verdaye. Hinî pê nê îqtîdarî na mesele nîna çareserkerdene. Abdullah Ocalanî çend rey vat ke o eşkeno na mesele zereyê yew hewteyî de çareser bikero. Xora eke pêkerdişê Dolmabahçe biameyêne caardene ewro ma nê meseleyî qisey nêkerdêne. Çi heyf ke ma yew îqtîdarî dir rî bi rî yê ke heme bedelê şerî keno milê şaran.” Çime: ANF
