Hemserekê DEM Partî Tuncer Bakirhanî Depe de vat ke erdê Mazlum Doganî de DEM Partî do ser bikewa û wina qisey kerd: “27 rojan ra dima ma do Depe û Dem biresnê yewbînan. Dem DEMê kurdan o.”

Tuncer Bakirhan û heyetê ci bajarekê Sarconî ra dima derbazê qezaya Depe ya Xarpêtî bîyî. Depe de bi hezaran kesan bi sloganan heyet pêşwazî kerd.

Bername de hêverî namzedê Şaredarîya Depe Songul Duzgune û Cafer Ogur dîyayî şinasnayene. 

Dima Bakirhanî qisey kerd û vat: “Îqtîdarê AKP-MHPyî dişmenê şarê kurdî, ziwan û kulturê şarê kurdî yo. Ma do 31ê adare de ferasetê îqtîdarî bikerê binê sindoqan. Înan rîyê dişmenîya xo ya vera kurdan ra welat binê krîzê ekonomîkî de verda. Ma Depe ra zî vanê ke meseleya kurdan bi çekan ney bi dîyalogan çareser bena.

Pêro şaredarîyanê îqtîdarî de rant, bêusulî, dizdî û rîyakerîye est ê. Ma seba ke Şaredarîya Depe de bi ziwanê dayîke xizmet bidê hê yenê. Ma venga pêro depijanê ke Ewropa de yê danê ke wa bêrê tîya û paştî bidê ma. Erdê Mazlûm Doganî de DEM Partî do ser bikewa. 27 rojan ra dima ma do Depe û Dem biresnê yewbînan. Dem DEMê kurdan o.”