Serekê PKKyî Abdullah Ocalanî 27ê Sibate de mesuldarîyêka tarîxî girewte xo ser û seba awankerdişê komelê demokratîkî pêşnîyazê xo yê girîngî kerdî. Ey nê pêşnîyazî koyan yan kerreyan rê nêkerdî. Muxatabê vengdayîşî eşkera yo, o zî dewlete ya. Naye ra dima her çî vileyê dewlete de yo. Wa hukmat û meclis mesuldarîya xo desinde bîyaro ca ke, proseso newî raver şero. Çareserî têna bi xîretê Ocalanî netîce nêdana. Ganî her teref berpirsîyarîya xo bizano. 27ê Sibate de leyêke ronîyaye, nika ganî her dînamîkê komelî qayîtê na leye bibo û aye pîl bikero. Sewbîna na leye berhem nêdana.
27ê Sibate ra dima Kurdîstan de hêrişê dewleta tirke ramîyayî. Heta nika Girê Cûdî, Garê, Amêdî û Hesekê de hêrişî virazîyayî. Hetêk ra temsîlkarê dewlete vanê ke “PKK adirbest bikero”, hetekê bînî ra binê destî ra hêrişan “han kenê”. No reftar aştîye rê xizmet nêkeno. Eke werte de çemê aştîye est o, ganî dewlete nê çemî pîl bikero. Binê şertanê şerî de prosesê aştîye nêno qiseykerdene.
Hukmatê Santosî û FARC
Ma dinya de raştê xeylêk nimûneyanê prosesê aştîye yenê. Mîsal Kolombîya de serra 2016î de mabênê hukmatê Santos û FARCî de peymana aştîye ameye îmzekerdene. Na peymane derheqê prosesê aştîye de xeylêk dayeyan dana. Seke zanîyeno Kolombîya de serra 1964î de FARCî yanî Artêşa Şorişgere ya Çekdar a Kolombîya dest pê têkoşînê çekdarî kerd. Bi taybetî dewijî zaf feqîr bîyî û wayîrê herre nêbîyî. Coka armancê FARCî yo sereke dewijan xizanîye ra xelisnayîş bî. Bi kilmî armanco sereke sinifkî bî, neteweyî nêbî. FARCo ke pabesteyê Partîya Komunîste ya Kolombîya bî, heta serra 2012yî têkoşîno sosyalîst kerd. Netîce de hukmatê Santosî fam kerd ke ganî persa dewijan bêro çareserkerdene û dest pê pêvînayîşan kerd. Semedê pêvînayîşan Kuba ra zî hetkarîye girewte. Merdim ganî bizano ke hem Kuba hem zî Venezuela verê cû piştî dabî FARCî, la serra 2012yî de înan zî fikr û reftarê xo bedilna. Pêvînayîşî çar serrî ramîyayî û netîce de 6 babetan ser o peymane virazîyaye. Mîyanê nê babetan de bêguman “reformê zîretî” û “tewrbîyayîşo sîyasî” zaf girîng bîyî. Peynî de îradeyo hempar serkewte bîbî. Nika Tirkîya de zî ganî îradeyo hempar bibo û seba çareserîye mesuldarîya xo bîyaro ca. Wa dewlete modelê Kolombîya bigêro verê xo û ci ra feydedar bibo.
Azadîya Ocalanî
Seba çareserîye bêşik pozîsyonê Serekê PKKyî Abdullah Ocalanî zaf krîtîk o. Çiqas ke Ocalan Îmrali de mîyanê kodesî de maneno û raştê îzolasyonî yeno, proses raver nêşino. Eke dewlete wazena nê prosesî xurt bikero, o wext ganî azadîya Ocalanî peyda bikero. Sewbîna proses do bi hawayêko sihetin meşero. Êdî dewlete qebûl bikero ke îzolasyon şikîya û şero taybet bêmana yo.
