Amed de 13yê teşrîna verêne de seba azadîya Serekê PKKyî mîtîngêko gird do bero serûberkerdene. Pêro sazgeh û dezgehê kurdan seba nê mîtîngî amadekarîya xo kenê. Sîyasetmedarê kurdan her roje seba tewrbîyayîşê girseyî veng danê. Wa şarê kurdî goş bido nê vengdayîşî. Nê tewr mîtîngî metodêkê têkoşînî yê. Têna parlamento de bîyayîş û keye de rexnekerdiş seba azadîya Ocalanî qîm nêkenê. Şaro ke kuçeyan nêşuxilneno, şaro “lumpen” û “lîberal” o. Merdimo lumpen merdimo ke kede, ziwan, kultur û îdeolojîyê xo ra dûrî maneno yo. Merdimo lîberal merdimo ke sinife û têkoşînê xo rê xerîb o. Ewro Serekê PKKyî Abdullah Ocalan têna yew merdim nîyo. O sembolê têkoşînê şarê kurdî yo. Ocalan temsîlkarê kede, ziwan, kultur û şerê sinifkî yo. Coka Îmrali de bi zordestîye tepişte yo. Coka vera ey tecrîdêko giran yeno caardene. 43 aşmî yo ci ra xebere bîla nêgêrîna. Dewleta tirke zana ke veng û ercnayîşê ey şarê kurdî rê rayîr mojnenê, coka vengê ey birnena. No reftarê dewleta cergan dûştê huqûqê mîyanneteweyî yo. Guantanomo de bîla rewşa nîyanêne çin a.
Nelson Mandela û Ocalan
Îdarekarê dewleta tirke ge-ge vera Nelson Mandelayî bi rêzdarîye têgêrenê û nameyê ey goynenê. Çike zanê ke Mandelayî vera kolonîzekerdoxan û sipîyan têkoşînêko bêhempa kerd. Seba nê têkoşînî 27 serrî zîndan de tepişîya. Zîndanê Pollsmoorî û Girawa Robenî de xeylê serrê çetinî derbas kerdî. Gelo îdarekarê tirkî caro mabênê Ocalanî û Mandelayî de tu cîyayîyêke vînenê? Girawa Îmraliyî ke çi ya, Girawa Robenî a ya. Senî ke ewro turîstî her welat ra şinê Girawa Robenî zîyaret kenê, demê ameyoxî de nê turîstî do Girawa Îmraliyî zîyaret bikerê û nameyê Ocalanî bîyarê xo vîrî. Ewro “sipîyî” tirkê ke vera kurdan nîjadperestîye kenê yê. Ewro vera kurdan zî rejîmê “apartheîdî” est o. Rixmo ke Bakûrê Kurdîstanî de bi mîlyonan kurdî ciwîyenê, ci rê destûr nêdîyeno ke ziwanê xo wareyê pêroyî de bişuxilnê. Parlamento de her ziwan yeno naskerdene, la ziwanê kurdî sey “ziwano xam” hesibîyeno. No hesibnayîş bêbinge nîyo.
Kolonyalîzmo hovî
100 serrî yo ke kurdî raştê nîjadperestîye û asîmîlasyonî yenê. Hertim ê sey “xerîb” hesibîyayî. Oxina ke mîyanê ronayoxanê na dewlete de yê. Her çî ra ver kurdî cayîyê Mezopotamya yê. Cografyaya xo de raştê kolonyalîzmê hovî yenê. Bi kilmî dinya senî ke ewro seba şarê Afrîkaya Başûrî bi rêzdarîye têgêrena û pawena, demê ameyoxî de pêro dinya do vera şarê kurdî û Serekê PKKyî Abdullah Ocalanî bi rêzdarîye têbigêro.
Teorîya Darwînî
Merdim gama ke kitabê Darwînî waneno, çimdarîye keno ke êyê ke hêzdar û biaqilî nê, êyê ke vera vurîyayîşan xo adapte kenê cuye de manenê. Na çarçewa de dewleta tirkan ganî hesabê xo bikero. Nêşinasnayîşê estbîyayîşê şarê kurdî emrê dewleta tirke derg nêkeno. Ganî na dewlete goreyê seserra 21. têbigêro. Yanî vera şaran, kêmneteweyîyan, grûbanê dînîyan û ziwananê cîyayan bi hawayêkê demokratîkî nêzdî bibo. Eke nêkena, ewro yan siba na dewlete do lete lete bibo. Çike raştîye arko ya, peynî de xo ferz kena.
Azadîye nêzdî ya
Serekê PKKyî Abdullah Ocalan ewro na raştîye temsîl keno. Eke dewleta tirke vera Ocalanî tecrîdî bidomno, a do xo pêro raştîye ra tecrîd bikero. No reftar seba cergan xelisîyayîş nîyo. Ewro yan siba dewleta tedaker û kolonyalîste do verê kurdan de zanîyanê xo rono. Ewro yan siba dewleta tirke do ziwan, kultur û tarîxê kurdan bişinasno. Seke merdimê verênî vanê roje nêzdîyê serê şewdirî de tewr tarî ya. Nika zî seba kurdan na tarîye est a. La roştîye yanî azadîye nêzdî ya.
