Awusturya de sendîkayê karkeran, partîyê sîyasîyî, temsîlkarê rêxistinanê heqanê merdiman, aktîvîst, akademîsyen, avûkat û rojnamegeran ra 23 kesan veng da CPTyî ke wa cade Îmraliyî zîyaret bikero. Serekê Komîteya Vergirewtişê Îşkenceyî (CPT) Alan Mitchellî rê mektubêke şawite û waşt ke CPT cade vera tecrîdê Îmraliyî têbigêro.

Mektube de ame vîrvistene ke Serekê PKKyî Abdullah Ocalanî ra 38 mengî yo xeberêke nêna girewtene û vera ey tecrîdêko giran yeno caardene.

Mektube wina dewam kena: “Rewşa Ocalanî ya tecrîdkerde bi giranî tesîrê şarê kurdî kena. Coka ma wazenê ke şima sey CPTyî cade têbigêrê. Mesuldarîya şima ya ke şorê Îmraliyî. Heqê şima yo ke Birêz Ocalanî de pêvînayîş bikerê.

Birêz Ocalan welatêkê endamê Konseya Ewropa Tirkîya de tecrîdkerde yo. O heqê xo yê pêvînayîşî ra bêpar yeno verdayene. Ma wazenê şima sey dezgehêkê Konseya Ewropa cade heyetêkê xoserî bişawê Îmraliyî ke no heyet wa Birêz Ocalanî de pêvînayîş bikero û derheqê rewşa ey de agahîyan bigêro. Ganî şima tedaya Tirkîya bikerê ke sey endamêka Konseya Ewropa krîteran bîyara ca. No do seba aştîya Tirkîya û çareserîya meseleya kurdan biba gamêke.”